ایم کیو ایم رابطہ کمیٹی کا بلوچستان کی تحصیل بھاگ میں امام بارگاہ کاظمیہ میں بم دھماکے کی سخت الفاظ میں مذمت
ملک میں جاری آپریشن ضرب عضب کے دوران محرم الحرام میں تخریب کاری کا واقعہ افسوسناک اور لمحہ فکریہ ہے، ایم کیوا یم رابطہ کمیٹی
غم کی گھڑی میں رابطہ کمیٹی اور تمام کارکنان عزاداران حسینؓ کے غم میں برابر کے شریک، دعا گو اور انکے شانہ بشانہ ہیں
امن و امان کی بہتری کے بلند و بانگ دعوے کئے جارہے ہیں ،بم دھماکہ قانون نافذ کرنیوالے اداروں کی کارکردگی پر سوالیہ نشان ہے
وزیر اعظم پاکستان ،وفاقی وزیر داخلہ ،وزیر اعلیٰ بلوچستان اور صوبائی وزیر داخلہ واقعہ میں ملوث افراد کو قرار واقع سزا دیں
متاثرین کو سرکاری سطح پر سہولیا ت فراہم کرنے کیلئے احکامات جاری کئے جائیں
کراچی ۔۔۔22اکتوبر2015ء
متحدہ قومی موومنٹ کی رابطہ کمیٹی نے بلوچستان کی تحصیل بھاگ کی امام بارگاہ کاظمیہ میں نماز مغرب کے دوران بم دھماکے کی سخت الفاظ میں مذمت کی ہے ۔ایک مذمتی بیان میں رابطہ کمیٹی نے واقعہ کو افسوسنا ک قرار دیتے ہوئے کہاکہ ملک میں جاری آپریشن ضرب عضب کے دوران محرم الحرام میں تخریب کاری کا واقعہ انتہائی افسوسناک اور لمحہ فکریہ ہے،ایک جانب ملک میں امن و امان کی بہتری کے بلند و بانگ دعوے کئے جارہے ہیں لیکن اس تمام تر صورتحال میں ایسا واقعہ قانون نافذ کرنیوالے اداروں کی کارکردگی پر سوالیہ نشان ہے۔رابطہ کمیٹی نے کہا کہ اس غم کی گھڑی میں ایم کیو ایم رابطہ کمیٹی اور تمام کارکنان عزاداران حسینؓ کے غم میں برابر کے شریک، انکے لئے دعا گو اور انکے شانہ بشانہ کھڑے ہیں۔انہوں نے وزیر اعظم پاکستان میاں محمد نواز شریف ، وفاقی وزیر اداخلہ چوہدری نثار علی خان ، وزیر اعلیٰ بلوچستان عبد المالک بلوچ اور صوبائی وزیر داخلہ سرفراز بگٹی سے مطالبہ کیا کہ وہ کاظمیہ امام بارگاہ بم دھماکے میں ملوث عناصر کو گرفتار کرکے انہیں قرار واقع سزا دلوائیں اور بم دھماکے کے متاثرین کو سرکاری سطح پر سہولیا ت فراہم کرنے کیلئے احکامات جاری کریں ۔