گوادر کے علاقے کان کہی میں کوسٹ گارڈ کی چیک پوسٹ پر دہشت گردوں کے حملہ پر الطاف حسین کااظہار مذمت

لندن۔۔۔27، جولائی 2013ء 

متحدہ قومی موومنٹ کے قائد جناب الطا ف حسین نے گوادر کے علاقے کان کہی میں کوسٹ گارڈ کی چیک پوسٹ پر دہشت گردوں کے حملے کی سخت ترین الفاظ میں مذمت کی ہے اور حملے کے نتیجے میں متعدد اہلکاروں کے شہید اور زخمی ہونے پر گہرے دکھ اور افسوس کااظہار کیا ہے ۔ ایک بیان میں جناب لطاف حسین نے وفاقی حکومت سے اپیل کی کہ ملک میں دہشت گردی کے سبب موجودہ حالات اس بات کے متقاضی ہے کہ تمام سیاسی ومذہبی جماعتوں کی آل پارٹیز کانفرنس بلانے میں مزید دیر نہ کی جائے اور اس میں عدلیہ کے ججز ، مسلح افواج کے سربراہان بشمول COASکو آبزور کے طور پر مدعو کیاجائے تاکہ ملک سے دہشت گردی کے خاتمے کیلئے ایک نکاتی اور ٹھوس حکمت عملی اختیار کی جاسکے ۔ انہوں نے کہا کہ ملک کو دہشت گردی سے نکالنا صرف حکومت ، سیاسی و مذہبی جماعتوں کی ہی نہیں بلکہ تمام طبقات کی ذمہ داری ہے اور اب یہ ذمہ داری محسوس کرکے ٹھوس اقدامات کرنے کا وقت آچکا ہے ۔ انہوں نے سیکورٹی چیک پوسٹ پر شہید ہونے والے اہلکاروں کے تمام سوگوار لواحقین سے دلی تعزیت وہمدردی کااظہار کیا اور شہداء کے بلند درجات اور زخمی اہلکاروں کی جلدو مکمل صحت یابی کیلئے دعا بھی کی ۔ جناب الطاف حسین نے وزیراعظم پاکستان نواز شریف اور وفاقی وزیر داخلہ چوہدری نثار علی خان سے مطالبہ کیا کہ ملک و قوم کو دہشت گردی کے عفریت سے نجات دلانے کیلئے مزید وقت کا زیاں نہ کیاجائے اور ملک کی سالمیت اور استحکام کیلئے جلد از جلد دہشت گردی کے خلاف حکمت عملی کو وضع کیاجائے ۔