نواسیء رسولؐ حضرت سیدہ بی بی زینبؓ کے مزارمقدسہ پر راکٹوں سے حملہ کیاگیالیکن اسلام کے نام پر جہادکرنیوالے اوراسلام کی نشاط ثانیہ کی باتیں کرنیوالے بڑے بڑے علماء خاموش ہیں۔رابطہ کمیٹی

کراچی ۔۔۔20 جولائی 2013ء

متحدہ قومی موومنٹ کی رابطہ کمیٹی نے اپنے بیان میں کہاہے کہ ملت اسلامیہ کی غیرت وحمیت کی جواجتماعی صورتحال ہے اس پر ہرہوشمند اوردین حق سے محبت کرنے والا اورہرعاشقِ رسول ؐ آج مسلمانوں کی حالت زاراوران پر ڈھائے جانے والے ظلم وستم کودیکھ کر انتہائی دل گرفتہ ہے ۔رابطہ کمیٹی نے کہاکہ عالمی سازشوں کے نتیجے میں عراق گیا، لیبیاگیا، مصرگیا، یمن گیا، لبنان پر اسرائیلی میزائلوں کے حملے ہوتے رہے ،شام پر یلغارہورہی ہے، کشمیرکامسئلہ اب تک حل نہیں کیاگیا، فلسطین،افغانستان اوربرمامیں مسلمانوں کی جوناگفتہ بہ صورتحال ہے اس سے سبھی واقف ہیں لیکن تمام اسلامی ممالک ،انکی تنظیم ’’ اوآئی سی ‘‘ اورپوری ملت اسلامیہ خاموش تماشائی بنی بیٹھی ہے ماسوائے چندلاکھ مسلمانوں کے جواسلام کادرد رکھتے ہیں۔رابطہ کمیٹی نے کہاکہ خاندان رسولؐ خصوصاً گزشتہ روز نواسیء رسولؐ حضرت سیدہ بی بی زینبؓ کے مزارمقدسہ پر راکٹوں سے حملہ کیاگیا جس سے مزارپاک کے متولی شہیدہوگئے لیکن افسوس کہ اسلام کے نام پر جہادکرنے والے اوراسلام کی نشاط ثانیہ کی باتیں کرنے والے بڑے بڑے علماء اس سانحہ پر خاموش ہیں۔رابطہ کمیٹی نے کہاکہ اس سانحہ پر اگرملت اسلامیہ میدان میں آکراحتجاج نہیں کرسکتی توکم ازکم زبان اورالفاظوں سے ہی اس قبیح اورگھناؤنے فعل کی کم از کم مذمت ہی کرڈالتے۔ رابطہ کمیٹی نے کہاکہ ہم حق پرست علماء سے اپیل کرتے ہیں کہ وہ بڑے بڑے علماء کے پاس جاکرانہیں جھنجھوڑیں اور ان سے کہیں کہ آپ خاموش تماشائی بن کرنہ بیٹھیں بلکہ میدان عمل میں آکرآوازاحتجاج بلندکریں اورخاموش رہ کر اللہ تعالیٰ کے جلال کودعوت نہ دیں،اسی میں پوری دنیاخصوصاً تمام مسلمانوں کی بھلائی ہے ۔