بی بی زینبؓ کے مزار پر حملہ کرنے والے مسلمان ہو ہی نہیں سکتے،الطاف حسین

لندن۔۔۔19 جولائی2013 ء

متحدہ قومی موومنٹ کے قائد جناب الطاف حسین نے شام میں حضرت بی بی زینبؓ کے مزار پر دہشت گردوں کے حملہ کی شدید الفاظ میں مذمت کرتے ہوئے کہا ہے کہ یہ حملہ مسلمانوں کے خلاف سازش ہے اور دہشت گردوں نے بی بی زینب کے مزار کی بے حرمتی کر کے اہل بیت یعنی آنحضرت ﷺ کے خاندان کی بے حرمتی اور توھین کی ہے۔ جناب الطاف حسین نے کہا کہ بی بی زینبؓ ،نبی آخر الزمانﷺ کی نواسی اور حضرت علی کرم اللہ وجہ اور بی بی فاطمتہ الزھراؓ کی بیٹی تھیں اور ان کے مزار پر حملہ کرنے والے مسلمان ہو ہی نہیں سکتے۔

جناب الطاف حسین نے کہا کہ میرے خلاف کتنی ہی سازشوں کے جال کیوں نہ بن لئے جائیں لیکن میں ظلم کو ظلم ، باطل کو باطل، مظلوم کو مظلوم اور حق کو حق کہتا رہوں گا۔انہوں نے کہا کہ بی بی زینبؓ صرف اہل تشیع کے لئے ہی نہیں بلکہ پوری ملت اسلامیہ کے لئے مقدس و محترم ہیں اور ان کے مزار کو نقصان پہنچانا پوری ملت اسلامیہ کو نقصان پہنچانے کے مترادف ہے۔جناب الطاف حسین نے کہا کہ میں اسلامی ممالک خصوصا علمائے دین سے اپیل کرتا ہوں کہ وہ اپنی خاموشی کے قفل توڑ دیں اور اس بر بر یت اور توھین آمیز سانحہ کے خلاف صدائے احتجاج بلند کریں۔

جناب الطاف حسین نے شیعہ سنی عوام سے بھرپور اپیل کی کہ وہ اپنا اتحاد برقرار رکھیں اور ان سازشوں کو سمجھیں جنکا مقصد مسلمانوں کو فرقہ وارانہ بنیادوں پر ایک دوسرے کے خلاف صف آراء کرکے انہیں کمزور کرنے کے علاوہ اور کچھ نہیں ہے۔