مقامی حکومتوں کے بغیرملک میں جمہوریت نامکمل ہے،ڈاکٹرخالدمقبول صدیقی

کراچی:۔۔۔19 جولائی 2013ء
تصاویر

متحدہ قومی موومنٹ کی رابطہ کمیٹی ڈپٹی کنوینرورکن قومی اسمبلی ڈاکٹرخالدمقبول صدیقی نے کہاہے کہ مقامی حکومتوں کے بغیرجمہوریت نامکمل ہے،ایم کیوایم جلدازجلد بلدیاتی انتخابات کے حق میں ہے اورجس کیلئے ایم کیوایم کی تیاری ہمہ وقت مکمل ہے ۔انہوں نے کہاکہ 1979کابلدیاتی نظام آئین کی شق140-Aسے متصادم ہے اورآئین سے متصادم نظام نافذنہیں کیاجاسکتا۔ان خیالات کااظہارانہوں نے جمعہ کی شام بفرزن کے علاقے15-Aفورمیں حق پرست رکن قومی اسمبلی شیخ صلاح کے فنڈسے تعمیرہونیوالے پارک’’خورشیدبیگم پارک‘‘ کے افتتاحی تقریب سے خطاب کرتے ہوئے کیا۔افتتاحی تقریب میں علاقے عوام نے بہت بڑی تعدادمیں شرکت کی جن میں بزرگ ، نوجوان ، خواتین اوربچے بھی بڑی تعدادمیں شامل تھے۔تقریب سے ایم کیوایم کی رابطہ کمیٹی کے رکن سیدامین الحق،شیخ محمدصلاح الدین ، رکن سندھ اسمبلی جمال احمدنے بھی مختصراًخطاب کیا اور قائدتحریک الطاف حسین اورایم کیوایم کے خلاف بین الاقوامی سطح پرجانے والی سازشوں سے عوام کوآگاہ کیا۔اس موقع پر کراچی تنظیمی کمیٹی کے ارکان،علاقائی سیکٹرویونٹ کمیٹیوں کے عہدیداران اورکارکنان بھی موجودتھے۔قبل ازیں ڈاکٹر خالد مقبول صدیقی نے حق پرست اراکین اسمبلی کے ہمراہ فتہ کاٹ کرپارک کاافتتاح کیااورپارک کی تعمیرپربفرزن کے عوام کومبارکبادپیش کی۔ڈاکٹرخالدمقبول صدیقی نے کہاکہ ایسے حالات میں جب حکومت اور نظام حکومت نے مکمل طورپراس شہرکونظراندازکیاہواہے شیخ صلاح الدین نے عوام کو خوبصورت پارک کاتحفہ دیاہے جوکہ اس بات ثبوت ہے کہ تمام ترنامناسب حالات کے باوجودایم کیوایم اپنے عوام کی خدمت کررہی ہے۔انہوں نے کہاکہ یہ شہرقومی خزانے میں سترفیصدسے زائدآمدن فراہم کرتاہے اگرملک میں کہیں بھی کوئی اسکول ،ہسپتال،سڑکیں تعمیرہوتی ہیں تووہ اس شہرکی ہی مرہوہن منت ہیں۔انہوں نے مزیدکہاکہ حق پرستوں کو جب جب موقع ملاہے انہوں نے خدمت کے ذریعے اس ملک کی شکل تبدیل کردی ہے۔قائدتحریک الطاف حسین اورایم کیوایم کے خلاف سازشوں کاسلسلہ ملک کے دائرے سے نکل کربیرون ملک پھیل چکاہے اس سے ایم کیوایم کے کارکنان اورعوام کااپنے قائدپریقین اورمزیدبڑھ گیاہے۔انہوں نے کہاکہ جب بھی ہم پراس طرح کاکوئی کڑاوقت آیا ہے توہم اورمزیدباہمت اور منزل سے قریب ترہوجاتے ہیں سازشوں سے ہمیں کوئی فرق نہیں پڑتاہے ہم جناب الطاف حسین کی قیادت میں اپنی منزل تک ضرور پہنچیں گے۔ بعدازاں انہوں نے میڈیا کے نمائندوں سے گفتگوکرتے ہوئے کہاکہ ایم کیوایم ملک میں حقیقی جمہوریت کے قیام کیلئے جدوجہدکررہی ہے جس میں عوام کوزیادہ سے زیادہ سہولتیں بہم پہنچائی جاسکیں۔انہوں نے کہاکہ بلدیاتی انتخابات کی آڑ میں اگرکوئی ایسانظام لانے کی کوشش کی جارہی ہے جس سے عوام کی بنیادی حقوق سلب کئے جاسکیں توایسے نظام سہولتیں فراہم نہیں کرسکتا۔انہوں نے سندھ میں امن وامان کے حوالے سے گفتگوکرتے ہوئے کہاکہ سندھ اورخصوصاًکراچی کے حالات پرہمیں بھی تشویش ہے اورہم سندھ حکومت اور وفاقی حکومت سے مطالبہ کرتے ہیں کہ کراچی میں امن کے قیام کیلئے فوری اقدامات کیے جائیں۔انہوں نے کہاک ملک کے وسیع ترمفادمیں اور کراچی کے امن کیلئے عوام کوبنیادی سہولتوں کی فراہمی کیلئے ایم کیوایم ہرشخص سے بات کرنے کوتیارہے۔