ایم کیوایم ابراہیم حیدری سیکٹر کے اسیر کارکن عرفان حیدر جاگیرانی کے بھائی رضوان حیدر جاگیرانی شہید کو چکر ا گوٹھ کے قبرستان میں سپرد خاک کردیا گیا

شہید کی نما زجنازہ اور تدفین میں رابطہ کمیٹی کے رکن نثار پہنور ، ایم کیوایم کراچی مضافاتی آرگنائزنگ کمیٹی کے انچارج و اراکین اور کارکنان کی بڑی تعداد میں شرکت 

ایم کیوایم کراچی مضافاتی آرگنائزنگ کمیٹی ابراہیم حیدری سیکٹر یونٹ چکرا گوٹھ کے اسیر کارکن عرفان حیدر جاگیرانی کے چھوٹے بھائی رضوان حیدر جاگیرانی کو چکرا گوٹھ کے قبرستان میں آہوں اور سسکیوں کے درمیان سپرد خا ک کردیا گیا،رضوان حیدر جاگیرانی کو گزشتہ روز جرائم پیشہ دہشت گردوں نے فائرنگ کرکے شہید کردیا تھا۔ شہید کی نماز جنازہ چکرا گوٹھ میں ہی ادا کی گئی ۔ نما زجنازہ اور تدفین میں ایم کیوایم کی رابطہ کمیٹی کے رکن نثار احمد پہنور ، ایم کیوایم کراچی مضافاتی آرگنائزنگ کمیٹی کے انچارج فرخ اعظم ، جوائنٹ انچارجز اسلم بلوچ ، محمد سلیم جوکھیو اور رکن سید احمد رضا زیدی کے علاوہ ایم کیو ایم ابراہیم حیدری سیکٹر کمیٹی کے ارکان ، یونٹوں کے ذمہ داران، کارکنان ، ہمدردوں اور شہید کے عزیز و اقارب نے شرکت کی ۔ شہید کی تدفین کے بعد رابطہ کمیٹی کے رکن نثار پہنور نے رضوان حیدر جاگیرانی کے والد نادر علی جاگیرانی، بھائیوں اور دیگر لواحقین سے ملاقات کی اور رضوان حیدر جاگیرانی کی شہادت پر قائد تحریک جناب الطاف حسین کی جانب سے دلی تعزیت وہمدردی کااظہار کیا ۔ انہوں نے دعا کی کہ اللہ تعالیٰ رضوان حیدر جاگیرانی کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کاحوصلہ اور صبر جمیل عطا فرمائے (آمین)