سندھ کی موجودہ حکومت دیہی سندھ کے نمائندوں کی حکومت ہے جس میں شہری سندھ کی کوئی نمائندگی نہیں۔ ڈاکٹرنصرت

کراچی ۔۔۔ 8 جون 2013ء

متحدہ قومی موومنٹ کی رابطہ کمیٹی کے ڈپٹی کنوینر ڈاکٹر نصرت نے کہاہے کہ سندھ کی موجودہ حکومت دیہی سندھ کے نمائندوں کی حکومت ہے جس میں شہری سندھ کی کوئی نمائندگی نہیں۔ اپنے ایک بیان میں انہوں نے کہاکہ صوبہ سندھ صرف دیہی سندھ کانام نہیں بلکہ سندھ کے شہری علاقے بھی سندھ دھرتی کاحصہ ہیں ۔ ڈاکٹرنصرت نے کہاکہ ہمارے آباؤاجداداپناسب کچھ پاکستان کے نام پرقربان کرکے یہاں آئے تھے ، ہمیں امیدتھی کہ یہاں سب پاکستانی بنکررہیں گے اورایک دوسرے کے حقوق کااحترام کریں گے اور سب کے ساتھ مساوی سلوک ہوگالیکن یہ ا مرافسوسناک ہے کہ 65 برس گزرجانے کے باوجودآج تک لسانی وعلاقائی نفرتیں اورعصبیتیں ختم نہیں ہوپائیں ، اسی لسانی عصبیت اورتفریق کے باعث مہاجروں میں بھی احساس محرومی تیزی سے پروان چڑھ رہاہے ۔ ڈاکٹر نصرت نے کہاکہ اگر لسانی تفریق اورعصبیت کایہ عمل اسی طرح جاری رہااورلوگوں کو امتیازی سلوک کانشانہ بنایاجاتارہاتویہ عمل شہری سندھ میں پائے جانے والے احساس محرومی میں مزیداضافے اورسندھ کے مستقل باشندوں میں دوریاں پیداکرنے کا سبب بنے گا۔