ہنگو کی تحصیل دو آبہ کے مرکزی بازار میں جے یو آئی (ف) کے امیدوار مفتی سید جانان کے قافلے کو بم دھماکے سے نشانہ بنانے پر الطاف حسین کاشدید اظہار مذمت

لندن۔۔۔7، مئی 2013ء 

متحدہ قومی موومنٹ کے قائد جناب الطاف حسین نے ہنگو کی تحصیل دو آبہ کے مرکزی بازار میں جمعیت علمائے اسلام (ف) کے امیدوار مفتی سید جانان کے قافلے کو بم دھماکے سے نشانہ بنانے کی سخت ترین الفاظ میں مذمت کی ہے اور بم دھماکے کے نتیجے میں متعدد بے گناہ افراد کے شہید اور جے یو آئی کے امیدوار مفتی سید جانان سمیت متعدد افراد کے زخمی ہونے پر گہرے دکھ اور افسوس کااظہار کیا ہے ۔ اپنے ایک مذمتی بیان میں انہوں نے کہاکہ تین صوبوں میں دہشت گرد بم دھماکے اورقتل و غارتگری کے ذریعے انتخابی عمل کو یرغمال بنانے کی کوشش کررہے ہیں اور جمہوریت پسند ، روشن خیال اور لبرل جماعتوں کے بعد اب مذہبی جماعتوں کو بھی انتخابات میں حصہ لینے کے آئینی ، قانونی اور اسلامی حق سے محروم کر دینا چاہتے ہیں ۔ انہوں نے کہاکہ جے یو آئی (ف) امیدواروں سمیت معصوم و بے گناہ افراد کو خاک و خون میں نہلانے والے سفاک دہشت گرد کسی کے دوست نہیں ہوسکتے اور یہ ظلم ، جبر اور بربریت کے ذریعے نام نہاد شریعت کا ملک پر نفاذ اور حکومت پر قبضہ چاہتے ہیں ۔ انہوں نے کہاکہ باشعور عوام نام نہاد کلاشنکوفی اور ڈنڈا بردار شریعت کسی قیمت پر قبول نہیں کریں گے اور دہشت گردوں کے آگے سیسہ پلائی دیوار ثابت ہوں گے ۔ انہوں نے جے یو آئی کے امیدوار مفتی سید جانان کے بم دھماکے میں شدید زخمی ہونے پر گہری تشویش کااظہار کیا اورجے یو آئی کے سربراہ مولانا فضل الرحمن ، رہنماؤں اور کارکنوں سے بم دھماکے کی کارروائی پر دلی ہمدردی اور افسوس کااظہار کیا ۔ انہوں نے بم دھماکے میں شہید ہونے والے افراد کے تمام سوگوار لواحقین سے دلی تعزیت وہمدردی کااظہار کیا اور جے یو آئی (ف) کے امیدوار مفتی سید جانان سمیت دیگر زخمیوں کی جلد ومکمل صحت یابی کیلئے دعا بھی کی ۔ جناب الطاف حسین نے صدر مملکت آصف علی زرداری ، نگراں حکومت اور الیکشن کمیشن آف پاکستان سے مطالبہ کیا کہ ہنگو کی تحصیل دو آبہ کے مرکزی بازار میں جے یو آئی (ف) کے امیدوار کے قافلے کو بم دھماکے سے نشانہ بنانے کا سنجیدگی سے نوٹس لیاجائے ، دہشت گردی کی روک تھام ، آزادانہ و منصفانہ انتخابات کے انعقاد اور دہشت گردوں کی گرفتاری کیلئے فی الفور عملی نوعیت کے اقدامات کئے جائیں اور عام انتخابات کو دہشت گردوں کے ہاتھوں ہائی جیک ہونے کا عمل فی الفور بند کرایاجائے ۔