چارسدہ میں پیپلزپارٹی کے انتخابی دفتر کے باہر بم دھماکے پر الطاف حسین کااظہار مذمت ۔

لندن۔۔۔6، مئی 2013ء 

متحدہ قومی موومنٹ کے قائد جناب الطاف حسین نے چارسدہ میں پیپلزپارٹی کے انتخابی دفتر کے باہر بم دھماکے کی سخت ترین الفاظ میں مذمت کی ہے اور ملک کی لبر ل ، اعتدال پسند اور روشن خیال جماعتوں کے خلاف دہشت گردی کی تسلسل کے ساتھ جاری مذموم کارروائیوں کو بد ترین اور کھلی دہشت گردی قرار دیا ہے ۔ اپنے ایک مذمتی بیان میں انہوں نے کہاکہ دہشت گردی اور بم دھماکوں کے ذریعے پیپلزپارٹی ، ایم کیوایم اور اے این پی کو اس کے آئینی ، جمہوری اور قانونی حق سے محروم رکھنے والے دہشت گرد اور ان کے سرپرست اپنے ناپاک مقاصد میں کبھی کامیاب نہیں ہوسکتے اور معصوم و بے گناہ لوگوں کا لہو ایک دن ضرور رنگ لائے گا اور ملک و قوم کو دہشت گردی اور انتہاء پسندی کے عفریت سے نجات ملے گی ۔انہوں نے کہاکہ دہشت گرد چاہے کتنی ہی بربریت اور قتل و غارتگری کرلیں لیکن وہ ملک کے باشعور عوام کو دین اسلام اور اس کی اصل روح کے مطابق زندگی بسر کرنے کے حق سے محروم نہیں کرسکتے اور عوام نام نہاد شریعت کو بم دھماکوں اور دہشت گردی کے ہتھکنڈوں سے خوف زدہ ہوکر ہرگز قبول نہیں کریں گے ۔ انہوں نے چارسدہ بم دھماکے میں پیپلز پارٹی زخمی کار کنان کی جلد و مکمل صحت یابی کیلئے دعا کی اور انتخابی دفتر کو دہشت گردی کا نشانہ بنانے پر پیپلزپارٹی کے رہنماؤں اور کارکنوں سے دلی ہمدردی کااظہار کیا ۔ جناب الطاف حسین نے صدر مملکت آصف علی زرداری اور نگراں وفاقی اور صوبائی حکومت سے مطالبہ کیا کہ چارسدہ میں پیپلزپارٹی کے انتخابی دفتر کے باہر بم دھماکے کا سنجیدگی سے نوٹس لیاجائے ، انتخابی دفاتر اور سیاسی کارکنوں کے تحفظ کیلئے فی الفور اقدامات کئے جائیں اور دہشت گردی میں ملوث سفاک دہشت گردوں کو فی الفور گرفتار کرکے آئین و قانون کے مطابق سزا دی جائے ۔