کہوٹہ کے سائنس دانوں نے مسلح افواج کے ساتھ ملکر پاکستان کو ایٹمی طاقت بنایا، طارق جاوید

کراچی ۔۔۔5، مئی 2013ء

متحدہ قومی موومنٹ کی رابطہ کمیٹی کے رکن طارق جاوید نے کہاہے کہ جو عناصر یہ دعویٰ کررہے ہیں کہ انہوں نے صرف کرکٹ ہی نہیں کھیلی بلکہ ایٹمی دھماکے بھی کیے ہیں، وہ قوم کو دھوکہ دے رہے ہیں۔ایک بیان میں طارق جاوید نے کہاکہ مکروفریب اور کھوکھلے دعوے کرنے والے قوم کو بے وقوف بنارہے ہیں اورانہیں قوم سے جھوٹ بولتے ہوئے شرم تک نہیں آتی ۔ان دھوکہ باز عناصر نے آج بھی قوم کو اپنا ہاری ، کسان اور مزدورسمجھ رکھا ہے کہ جب چاہا انہیں اپنی بھٹی میں جھونک دیا۔ انہوں نے کہاکہ پاکستان کے باشعور عوام اچھی طرح جانتے ہیں کہ ایٹمی دھماکے کہوٹہ کے سائنس دانوں نے مسلح افواج کے ساتھ مل کرکئے اور پاکستان کو ایٹمی طاقت بنایا ۔ملک بھر کے عوام اچھی طرح جانتے ہیں کہ پاکستان کو ایٹمی طاقت بنانے میں ،ان کھوکھلے دعوے کرنے والوں کا کوئی عمل دخل نہیں ہے ۔ طارق جاوید نے کہاکہ ایٹمی دھماکے کرنے کی جرات رکھنے والے صرف جیل سے رہائی کی خاطر معافی نامے لکھ کر اورجرنیلوں کے جوتے چاٹ کرمعافی کے خواستگار نہیں ہوتے ۔ نہ ہی معافی مل جانے کے بعد اپنے کارکنوں کو چھوڑ کر رات کی تاریکی میں خاموشی سے تمام مال ومتاع ، سونا چاندی، روپیہ پیسہ اپنے خاندان اور نوکروں کی فوج کے ساتھ بیرون ملک فرار ہوتے ہیں۔