سابق وزیراعظم راجہ پرویز اشرف اور الطاف حسین کے درمیان ٹیلی فون پر رابطہ

لندن۔۔۔2،مئی2013ء

متحدہ قومی موومنٹ کے قائد جناب الطاف حسین نے کہاہے کہ پنجاب کے لبرل اور روشن خیال سیاسی رہنماؤں کو آگے بڑھ کر ملک کے دیگر صوبوں میں ہونے والے دہشت گردی کے واقعات کی مذمت کرنی چاہئے ۔ یہ بات جناب الطاف حسین نے جمعرات کی شام سابق وفاقی وزیراعظم جناب راجہ پرویزاشرف سے ٹیلی فون پر گفتگو کرتے ہوئے کہی۔جناب الطاف حسین نے کہاکہ لبرل اورجمہوریت پسند جماعتوں پر دہشت گردحملے کرکے انہیں انتخابات سے باہر رکھنے کی سازش کی جارہی ہے تاہم ہمارا عزم ہے کہ ہم دہشت گردوں کے آگے ہرگز سرینڈرنہیں کریں گے۔

جناب راجہ پرویز اشرف نے جناب الطاف حسین سے گفتگو کرتے ہوئے صوبہ سندھ، خیبرپختونخوا اور بلوچستان میں دہشت گردی کے بڑھتے ہوئے واقعات کی مذمت کی اور ملک میں اعتدال پسندجماعتوں کو یکجا کرنے میں جناب الطاف حسین کی کاوشوں اور کردار کوسراہا۔ راجہ پرویز اشرف نے کہاکہ پنجاب سمیت پاکستان کے تمام رہنماؤں کا قومی فریضہ ہے کہ وہ دہشت گردوں کے خلاف سیسہ پلائی دیواربن جائیں اور دہشت گردی کے ہرعمل کو اپنے اتحاد سے ناکام بنادیں۔ دونوں رہنماؤں کے درمیان ملک کی موجودہ سیاسی صورتحال پر بھی تفصیلی تبادلہ خیال کیا گیا۔