سب میرین کیبل میں خرابی کے سبب پاکستان میں انٹرنیٹ سروس کم ہونے کے باعث طلباء ، کاروباری حضرات سمیت نجی و سرکاری دفاتر کی کارکردگی شدید متاثر ہونے پر سابق حق پرست اراکین اسمبلی کااظہار تشویش
حکومت کی یقین دہانی کے باوجود اب تک سب میرین کیبل میں پیدا ہونے والی خرابی کو دور کرنے کیلئے کوئی اقدامات نہ کرنا پاکستان میں موجود کروڑوں انٹرنیٹ صارفین کی کھلی حق تلفی ہے، سابق اراکین اسمبلی
پاکستان میں انٹرنیٹ سروس کم ہونے پر حکومت اور متعلقہ وزارت کی عدم توجہی صریحاًمجرمانہ غفلت ہے ،سابق حق پرست اراکین
کراچی ۔۔۔22، اپریل2013ء
متحدہ قومی موومنٹ کے سابق حق پرست اراکین اسمبلی نے سب میرین کیبل میں خرابی کے باعث پاکستان میں انٹرنیٹ سروس کم ہونے کے سبب طلباء ، کاروباری حضرات سمیت نجی و سرکاری دفاتر کی کارکردگی شدید متاثر ہونے پر گہری تشویش کااظہار کیا ہے اور نگراں حکومت اور وزارت انفارمیشن ٹیکنالوجی سے مطالبہ کیا کہ سب میرین کیبل میں خرابی دور کرنے کیلئے فی الفور مثبت اور عملی نوعیت کے اقدامات بروئے کار لائے جائیں ۔ اپنے ایک بیان میں انہوں نے کہاکہ تقریبا15دن قبل سب میرین کیبل میں خرابی پیدا ہونے کے سبب پاکستان میں انٹرنیٹ کے صارفین شدید متاثر ہورہے ہیں اور انہیں سنگین مسائل اورمشکلات کا سامنا کرنا پڑ رہا ہے ۔انہوں نے کہا کہ حکومت کی یقین دہانی کے باوجود اب تک سب میرین کیبل میں پیدا ہونے والی خرابی کو دور کرنے کیلئے کوئی اقدامات نہ کرنا پاکستان میں موجود کروڑوں انٹرنیٹ صارفین کی کھلی حق تلفی ہے ۔سابق حق پرست اراکین اسمبلی نے صدر مملکت آصف علی زرداری ، نگران وزیراعظم میر ہزار خان کھوسو اور وزارت انفارمیشن ٹیکنالوجی سے مطالبہ کیا کہ پاکستان میں سب میرین کیبل میں خرابی کے باعث انٹرنیٹ سروس کم ہونے کے سنگین مسئلے کا سنجیدگی سے نوٹس لیاجائے اور اس جانب بھر پور توجہ دیکر سب میرین کیبل میں پیدا ہونے والی خرابی کوفی الفور دور کیاجائے ۔