نگراں وفاقی وزیرداخلہ ملک حبیب کا ایم کیوایم قائد جناب الطاف حسین سے رابطہ

لندن۔۔۔11، اپریل 2013ء

نگراں وفاقی وزیرداخلہ ملک حبیب نے ایم کیوایم لندن سیکریٹریٹ فون کرکے ایم کیوایم قائد جناب الطاف حسین سے گفتگوکی اور حید رآباد میں ایم کیوایم کے امیدوار فخرالاسلام اورکراچی میں کئی کارکنوں کی شہادت کے واقعہ پرافسوس کااظہارکیا۔ جناب الطاف حسین نے نگراں وفاقی وزیرداخلہ کو حیدرآبادمیں سندھ اسمبلی کے حلقہ پی ایس 47سے ایم کیوایم کے امیدوارفخرالاسلام،ایم کیوایم کی لٹریچر کمیٹی کے رکن شیراز اوردیگرکارکنوں کی شہادت کے واقعات سے آگاہ کیا ۔ جناب الطاف حسین نے کارکنوں کی شہادت علاقوں میں چھاپوں ،محاصروں اور ایم کیوایم کے کارکنوں ،ہمدردوں کی گرفتاریوں کے واقعات پر بھی اپنے شیدید تحفظات کا اظہار کرتے ہوئے کہا کہ اس صورتحال کی وجہ سے ایم کیوایم کی انتخابی مہم کو سبوتاژ کیا جارہا ہے ۔نگراں وزیر داخلہ جناب ملک حبیب نے جناب الطاف حسین کو یقین دہانی کرائی کہ وہ ایم کیوایم کی ان شکایات کی تحقیقات کروائیں گے اور از خودکراچی آکر تمام اقدامات کی نگرانی کریں گے اور اس امر کو بھی یقینی بنائیں گے کہ ایم کیوایم سمیت ہر سیاسی جماعت کسی قسم کی انتقامی کارروائیوں کے بغیر انتخابات میں شرکت کرے۔