جب تک حکمراں پیپلز پارٹی کے رہنماء جرائم پیشہ عناصر کی سرپرستی کرتے رہیں گے اس وقت تک کراچی میں جرائم پیشہ عناصر کی کارروائیاں ختم نہیں ہوسکتیں، کراچی تنظیمی کمیٹی

کراچی ۔۔10مارچ 2013ء 

متحدہ قومی موومنٹ کراچی تنظیمی کمیٹی کے ارکان نے کہا ہے کہ جب تک حکمراں پیپلز پارٹی کے رہنماء جرائم پیشہ عناصر کی سرپرستی کرتے رہیں گے اس وقت تک کراچی میں جرائم پیشہ عناصر کی کارروائیاں ختم نہیں ہوسکتیں ۔ اپنے ایک بیان میں کراچی تنظیمی کمیٹی کے ارکان نے کہا کہ یہ بات کراچی کا بچہ بچہ جانتا ہے کہ جرائم پیشہ عناصر پر مشتمل کا لعدم پیپلز امن کمیٹی کے دہشت گرد کراچی میں بھتہ ، اغوابرائے تاوان ، پویس اور تاجروں ودکانداروں اور عام شہریوں کی ٹارگیٹ کلنگ میں ملوث ہیں اور دو روز قبل گینگ وار کے دہشت گردوں نے رینجرز کے دو اہلکاروں کو بھی اغوا کرنے کے بعد تشدد کرکے قتل کر دیا ۔لیکن حکومت ان دہشت گر دوں کے خلاف کارروائی نہیں کرتی ،پیپلز پارٹی کے ایم این اے قادر پٹیل ان دہشت گردوں کی پشت پناہی کررہے ہیں۔ تنظیمی کمیٹی کے ارکان نے کہا کہ اگر جرائم پیشہ عناصر کے خلاف کارووائی کرنے کے بجائے ان کی سرکاری سرپرستی کی جاتی رہے گی تو دہشت گردی اورجرائم کا خاتمہ نہیں ہوسکتا ۔