اے آروائی کے پروگرام ’’سرعام ‘‘کی تحقیقاتی ٹیم پر جرائم پیشہ افراد کے حملہ پر جناب الطاف حسین کا اظہار مذمت

کراچی۔۔۔۔۔5مارچ، 2013ء

متحدہ قومی موومنٹ کی رابطہ کمیٹی کے رکن و انچارج شعبہ اطلاعات واسع جلیل نے حیدر آباد کے علاقے ٹنڈو میر محمود میں نجی ٹی وی چینل کی ٹیم پر 50سے زائد مسلح منشیات فروشوں کے حملے کے نتیجے میں دو افراد کے زخمی ہونے کے واقعے کی شدید الفاظ میں مذمت کرتے ہوئے واقعے کو آزادانہ صحافت پر حملہ قرار دیا ہے۔ ایک بیان میں رابطہ کمیٹی کے رکن و انچارج شعبہ اطلاعات واسع جلیل نے سندھ حکومت اور قانون نافذ کرنے والے اداروں سے پرزور مطالبہ کیا کہ دہشت گرد منشیات فروش حملہ آوروں کو فی الفور گرفتار کرکے حکومتی عملداری کو یقینی بنایا جائے۔ انہوں نے کہا کہ آزاد پرنٹ و الیکٹرانک میڈیا اپنی ذمہ داری انتہائی دلیری اور جانفشانی سے ادا کرتے ہوئے معاشرے میں پھیلی برائیوں کی نشاندہی کررہا ہے اب حکومت وقت کی یہ اولین ذمہ داری ہے کہ حقائق کی روشنی میں جرائم پیشہ عناصر کی سرکوبی کی جائے اور صحافی برادری کی جان و مال کے تحفظ کو بھی یقینی بنایا جائے ۔ دریں اثناء حق پرست رکن سندھ اسمبلی وسیم حسین نے حملے کو آزادی صحافت پر حملہ قرار دیتے ہوئے کہا ہے کہ جرائم پیشہ منشیات فروش عناصر کی جانب سے صحافیوں پر حملے انتظامیہ کی نااہلی کا منہ بولتا ثبوت ہے اور صحافیوں پر حملے کرنے والے کو فی الفور گرفتار کیا جائے ۔حق پرست رکن سندھ اسمبلی وسیم حسین نے اسپتال جاکر زخمیوں کی عیادت کی اور اسپتال انتظامیہ کو ہدایت کی کہ زخمی ہونے والے صحافیوں فوری طبی امداد فراہم کی جائے اور ان کے علاج و معالجے میں کوئی کسر نہ چھوڑی جائے ۔