پاکستان چھوڑ کر بیرون ملک پناہ لینے والے بعض متعصب اینکرپرسنز، یوٹیوبرز پاکستان کے عوام کوحقائق بیان کرنے کے بجائے آج بھی مہاجروں اوران کی جماعت ایم کیوایم سے نفرت اورتعصب کابیانیہ پیش کررہے ہیں۔
ڈاکٹرمعید پیرزادہ، وجاہت سعید خان، عمران ریاض، شہباز گل، شہزاد اکبر مرزا، شاہین صہبائی، صابر شاکر اوران جیسے دیگرشاؤنسٹ صحافیوں کو مہاجروں سے ازلی بیر ہے ، یہ بانیان پاکستان اور ان کی اولادوں کے خلاف زہراگلتے ہیں ۔پنجاب سے تعلق رکھنے والے ایسے ہی شاؤنسٹ عناصرنے مادرملت محترمہ فاطمہ اورجناح بیگم رعنا لیاقت علی خان تک کو مغلظات بکیں، ماضی میں کتیاکے گلے میں لالٹین ڈال کر محترمہ فاطمہ جناح کی توہین کی اور مہاجروں سے سیاسی نسل پرستی کا عمل کیا۔
پنجاب سے تعلق رکھنے والے یہ بیرون ملک مقیم صحافی ، اینکرپرسنز اور یوٹیوبرز پاکستان چھوڑنے سے قبل فوج کی کاسہ لیسی کرتے تھے اور فوج کی شان میں قصیدہ گوئی کرتے تھے ۔ ان کے علاوہ جتنے بھی پنجابی اسپیکنگ اینکرپرسنز، صحافی اور یوٹیوبرز ہیں ان میں سے سچ بولنے والے ایک دانشور، اینکرپرسن سیاسی تجزیہ نگاراورشاعروادیب کے علاوہ دیگر صحافی یاتوخاموش ہیں یا اگرخاموش نہیں ہیں تو وہ فوج کے ناجائزاقدامات کی حمایت یا مخالفت نہیں کرتے ۔
بیرون ملک پناہ لینے والے ان صحافی ، اینکرپرسنزاور یوٹیوبرز نے یہ بیانیہ اپنا رکھا ہے کہ پی ٹی آئی کے کارکنان کے خلاف ایکشن ہورہے ہیں ایسے مظالم پاکستان کی تاریخ میں کسی جماعت کے ساتھ نہیں ہوئے ، یہ صحافی تکلفاً پیپلزپارٹی ، ذوالفقار علی بھٹو اور بے نظیربھٹو کاتوذکر کردیتی ہے مگر ان متعصب اور شاؤنسٹ اینکرپرسنز کے منہ سے کبھی نہیں نکلتا کہ الطاف حسین 33 برسوں سے جلاوطنی کی زندگی گزار رہے ہیں ، یہ جب بھی ایم کیوایم کا ذکر کرتے ہیں تو کہتے ہیں کہ ایم کیوایم دہشت گردجماعت ہے ، بھتہ خورجماعت ہے اور اس پر بوری بند لاشوں کا الزام لگاتے ہیں ۔
شاؤنسٹ ذہنیت رکھنے والی یہ صحافی مافیا اس سچائی کو دانستہ نظرانداز کرتی رہی ہے کہ ایم کیوایم ملک کی تیسری بڑی جماعت ہے جس کے بانی وقائد الطاف حسین ہیں اور جس نے غریب اور لوئرمڈل کلاس طبقے سے جنم لیا ہے ، پاکستان کے غریب ومتوسط طبقے سے ایک شخص اٹھا جس نے روٹی ،کپڑا ،مکان اورجمہوریت کا نعرہ نہیں لگایا بلکہ فرسودہ جاگیردارانہ نظام اورفوجی جنتا کے خلاف آواز بلند کی ۔ ایم کیوایم پاکستان کی واحد جماعت ہے جس نے منتخب ایوانوں میں غریب ومتوسط طبقے کے ان تعلیم یافتہ افراد کو منتخب ایوانوں میں بھیجا جو ایک بینر بنانے کی استطاعت نہیں رکھتے تھے ۔
میں ان متعصب صحافیوں کو چلینج دیتا ہوں کہ وہ قوم کو بتائیں کہ غریبوں کی حکمرانی کی انقلابی جماعت آیا PTI ہے یاMQM ؟پاکستان کی تاریخ میں پہلی مرتبہ غریب اورلوئر مڈل کلاس کے تعلیم یافتہ افراد کوجو ڈاکٹرز،انجینئرز،و کلاء تھے انہیں سینیٹ، قومی اسمبلی اور صوبائی اسمبلی میں کون لایا؟ایم کیوایم کے علاوہ یہ کسی ایک جماعت کا نام بتائیں جس نے اس ناممکن کو ممکن کردکھایاہو ۔ جب پی ٹی آئی پر عتاب آیاتو یہ شاؤنسٹ صحافی پاکستان چھوڑ کر امریکہ ، برطانیہ اور کینیڈا آگئے ، یہ جمہوریت اور انسانیت کی بڑی بڑی باتیںکرتے ہیں لیکن عوام کو سچ نہیں بتاتے ۔
جو لوگ یہ کہتے ہیں کہ پی ٹی آئی جیسا ظلم کسی پر نہیں ہوا وہ دراصل عیاری ، مکاری اور دھوکے بازی کررہے ہیں ۔ 19، جون 1992ء کوایم کیوایم کے خلاف اعلانیہ فوجی آپریشن کیاگیا ، شاؤنسٹ ذہنیت رکھنے والے یہ صحافی اوراینکرپرسنز ملک کی کسی ایک بھی سیاسی ومذہبی جماعت کا نام بتائیں جس کے خلاف فوج نے اس طرح اعلانیہ آپریشن کیاہوجس طرح ایم کیوایم اورمہاجروںکے خلاف کیاگیا اورآج تک کیاجارہا ہے ؟ ایم کیوایم کے ہزاروں کارکنوں کو ماورائے عدالت قتل کیاگیا، عزیزآبادکا شہداء قبرستان ہمارے شہیدوں کی قبروں سے بھرا ہوا ہے جن میں میرے بڑے بھائی ناصر حسین ، بھتیجے عارف حسین اوربہنوئی اسلم ابراہانی بھی شامل ہیں ، فوج نے میرے بڑے بھائی، بھتیجے اور بہنوئی کو کیوں قتل کیاجبکہ وہ نہ تو ایم کیوایم کے کارکنان تھے اور نہ ہی ان کاسیاست سے کوئی تعلق تھا۔ کیاعمران خان کے کسی بھائی ، بھتیجے یابہنوئی کو اس طرح ماورائے عدالت قتل کیاگیا جس طرح الطاف حسین کے رشتے داروںکو قتل کیاگیا؟ کیاپی ٹی آئی کے سینکڑوں کارکنوں کولاپتہ کیاگیا؟ کیاپی ٹی آئی کے کارکنوں کوگرفتارکرکرکے ،ان کومہینوں اوربرسوں تک لاپتہ رکھ کران کی مسخ شدہ لاشیں پھینکی گئیں؟ایم کیوایم کے متعدد کارکن کئی برسوں سے آج تک لاپتہ ہیں جنہیں آج تک کسی بھی عدالت میں پیش نہیں کیاگیا۔ لیکن یہ شاؤنسٹ صحافی کبھی ان بھیانک مظالم کاذکرنہیں کرتے بلکہ ہمیشہ ایم کیوایم اورالطاف حسین پر الزامات لگاتے ہیں۔ یہ شاؤنسٹ صحافی عوام سے جتنے ہی حقائق چھپائیں اورجتناہی جھوٹ بولیں لیکن میں عوام کوسچ بتاتارہوں گا۔
الطاف حسین
ٹک ٹاک پر 291 ویں فکری نشست سے خطاب
31، جولائی2025ئ