سندھ کے اہم اداروں کی بھرتیوں میں کراچی کے اُردو بولنے والے عوام کو نظر انداز کیا جانا تنگ نظری ہے ، حق پرست ارکا ن سندھ اسمبلی

کراچی ۔۔۔18ستمبر 2014ء

حق پرست ارکان صوبائی اسمبلی نے صوبہ سندھ کے مختلف اہم اداروں کی بھرتیوں میں کراچی سے تعلق رکھنے والے تعلیم یافتہ افراد کو نظر انداز کئے جانے پر گہری تشویش کا اظہا ر کرتے ہوئے ایسے اقدامات کو تنگ نظری اور کراچی کے عوام سے نا انصافی قراردیا ہے ۔ ایک مشترکہ بیان میں حق پرست ارکان صوبائی اسمبلی نے کہا کہ گزشتہ دنوں حکومت سندھ کی جانب سے ایک اہم ادارےNational Accountability Bureau(NAB) میں تقریباً 250سے زائد افراد کو بھر تی کیا گیا ہے لیکن اس سلسلے میں کراچی کے اُردو بولنے والے تعلیم یافتہ نوجوانوں کو مکمل طور پر نظر انداز کرکے سندھ کے دیگر علاقوں کے افراد کو بھرتی کیا گیا ہے جو سراسر میرٹ کا قتل عام ہے۔ حق پرست ارکان سندھ اسمبلی نے وزیر اعظم پاکستان میاں محمد نواز شریف،گورنر سندھ ڈاکٹرعشرت العباد خان اور وزیر اعلیٰ سندھ سید قائم علی شاہ سے مطالبہ کیا ہے کہ وہ پاکستان کی ترقی میں کراچی کے عوام کے واضح کردار کو مد نظررکھتے ہوئے شہر کے عوام کو معاشی طور پر غیر مستحکم کرنے اور روزگار کی فراہمی میں ان کے ساتھ نا انصافی کے اس عمل کو فی الفور رکوائیں ۔