کوئٹہ میں سمنگلی ایئر بیس اور خالد آرمی ایوی ایشن بیس پر دہشت گردوں کے بیک وقت حملوں پر الطاف حسین کااظہار مذمت
دہشت گردوں کی کارروائی بدترین ہے اور ملک کی سلامتی پر کھلا حملہ ہے ، الطاف حسین
سیکورٹی فورسز نے حملے کو جواں مردی ، بہادری اور جرات سے ناکام بنایا جس پر افسران اور اہلکار وں کو جس قدر خراج تحسین پیش کیاجائے کم ہے ، الطاف حسین
حملے میں زخمی ہونیوالے سیکورٹی اہلکاروں اور دیگر افراد سے اظہار ہمدردی اور جلد و مکمل صحت یابی کیلئے الطاف حسین کی دعا
لندن:۔۔۔15اگست2014ء
متحدہ قومی موومنٹ کے قائدجناب الطا ف حسین نے دہشت گردوں کے کوئٹہ میں سمنگلی ائیربیس اورخالدآرمی ایوی ایشن بیس پربیک وقت حملے کی سخت ترین الفاظ میں مذمت کی ہے اوران حملوں کو بد ترین کارروائی اور ملک کی سلامتی پر کھلا حملہ قرار دیا ہے ۔ ایک بیان میں انہوں نے کہاکہ شمالی وزیرستان میں جاری آپریشن ضرب عضب کے باوجود دہشت گردوں کا سمنگلی ایئر بیس اور خالد آرمی ایو ی ایشن پر حملہ کرناکھلی دہشت گردی ہے اور یہ حملے ملک کو عدم استحکام سے دوچار کرنے کی گھناؤنی سازش کا تسلسل ہیں ۔انہوں نے کہاکہ سیکورٹی فورسز نے سمنگلی ایئر بیس اور خالد آرمی ایوی ایشن بیس پر دہشت گردوں کے حملوں کو جس جواں مردی سے ناکام بنایا اور ان کا قلع قمع کیا اس پر سیکورٹی فورسز کے افسران اور اہلکاروں کو جس قدر خراج تحسین پیش کیاجائے کم ہے ۔ انہوں نے کہاکہ دہشت گردوں کے بیک وقت حملوں کی بدترین ناکامی سے ثابت ہوگیا ہے کہ سیکورٹی فورسز کی بہادری ، جرات اور حب الوطنی کے سامنے دہشت گرداپنے مذموم مقاصد میں کبھی کامیاب نہیں ہوسکتے ۔ انہوں نے دہشت گردوں کے حملے میں متعدد سیکورٹی اہلکاروں اور دیگر افراد کے زخمی ہونے پر دلی ہمدردی کااظہار کیا اور زخمیوں کی جلد ومکمل صحت یابی کیلئے دعا کی ۔ جناب الطاف حسین نے وفاقی اور صوبائی حکومت بلوچستان سے مطالبہ کیا کہ کوئٹہ میں سمنگلی ایئر بیس اور خالد آرمی ایوی ایشن پر ایک ساتھ حملوں میں ملوث دہشت گردوں کے سر پرستوں کو فی الفور گرفتار کیاجائے اور ملک بھر سے دہشت گردی کے نیٹ ورک کے خاتمے کیلئے مثبت اور ٹھوس اقدامات بروئے کار لائے جائیں ۔