کنٹینرز اور رکاوٹیں ہٹانے کے فیصلے پر وزیراعظم نوازشریف، وزیراعلیٰ شہبازشریف، کابینہ خصوصاً وفاقی وزیرداخلہ چوہدری نثار کا ہزاروں دعاؤں کے ساتھ شکریہ ادا کرتا ہوں۔ الطاف حسین

عوام یوم آزادی جوش و خروش سے منائیں، حسب توفیق صدقہ دیں اور غریبوں کو کھانا کھلائیں۔ الطاف حسین

لندن۔۔۔13 اگست 2014ء

متحدہ قومی موومنٹ کے قائدجناب الطاف حسین نے لانگ مارچ کے دوران کنٹینرز اوررکاوٹیں ختم کرنے کے حکومتی فیصلے پر وزیراعظم میاں محمدنوازشریف ، وزیراعلیٰ پنجاب میاں شہبازشریف، وفاقی کابینہ کے ارکان خصوصاًوفاقی وزیرداخلہ چوہدری نثارکا ہزاروں دعاؤں کے ساتھ خصوصی شکریہ ادا کیا ہے کہ انہوں نے جمہوریت کاپاس رکھا اور کنٹینرز اور رکاوٹیں ہٹاکر لانگ مارچ کی اجازت دی۔ جناب الطاف حسین نے کہاکہ خدا کا شکر ہے کہ حکومت کے اس فیصلے سے مارچ کے دوران تصادم،تشدد اورقتل وغارتگری کاخطرہ ٹل گیا۔ انہوں نے کہاکہ میں لانگ مارچ کرنے والی جماعتوں سے ایک بارپھراپیل کرتاہوں کہ وہ یوم آزادی کے تقدس کاخیال رکھتے ہوئے اپنے مارچ کومکمل طورپرپرامن رکھیں اوراس بات کویقینی بنائیں کہ انکے مارچ کے دوران شہریوں کاکوئی جانی ومالی نقصان نہ ہو، کسی قسم کی کوئی توڑ پھوڑ نہ ہو،کوئی دیواراورکوئی گملہ تک نہ ٹوٹے۔ جناب الطاف حسین نے پاکستانی عوام سے اپیل کی کہ وہ پاکستان کا یوم آزادی جوش و خروش سے منائیں اور یوم آزادی پرخوشی ضرور منائیں لیکن اس خوشی میں حسب توفیق صدقہ دیں اورغریبوں کو کھانا کھلائیں۔