لاہور میں کھڑے کئے گئے کنٹینرز،ٹرالرز اوردیگررکاوٹوں کو ہٹانے کے فوری احکامات جاری کئے جائیں۔ وزیراعظم نوازشریف اوروزیراعلیٰ پنجاب شہباز شریف سے ایم کیوایم کے قائدالطاف حسین کا پرزورمطالبہ

لندن۔۔۔13 اگست 2014ء

متحدہ قومی موومنٹ کے قائدجناب الطاف حسین نے وزیراعظم میاں نوازشریف اوروزیراعلیٰ پنجاب میاں شہباز شریف سے پرزورمطالبہ کیاہے کہ وہ لاہور کے مختلف علاقوں میں کھڑے کئے گئے کنٹینرز،ٹرالرز اوردیگررکاوٹوں کوایس او ایس بنیادوں پر ہٹانے کے فوری احکامات جاری کریں۔ اپنے ایک بیان میں جناب الطاف حسین نے کہاکہ گزشتہ کئی روزسے لاہورشہرمیں پولیس وانتظامیہ نے جگہ جگہ رکاوٹیں کھڑی کردی ہیں جس سے روزگار، کاروباراورملازمت پر جانے والے افرادکوشدید رکاوٹوں کاسامناہے۔ ان رکاوٹوں سے سب سے زیادہ متاثر یومیہ اجرت پر کام کرنے والے وہ غریب مزدور اورمحنت کش ہیں جو ہر روزمحنت کرکے اپنے اہل خانہ کاپیٹ پالتے ہیں۔اس کے ساتھ ساتھ شاہراہیں بندہونے سے مریضوں کواسپتال لانے لیجانے میں بھی شدید دشواریوں کاسامناہے۔ جناب الطاف حسین نے حقوق انسانی کی تمام تنظیموں ، سول سوسائٹی کی تمام انجمنوں، وکلاء برادری اورمختلف شعبہ ہائے زندگی سے تعلق رکھنے والے افرادسے بھی اپیل کی کہ و ہ حکومت کی جانب سے اٹھائے گئے ان ظالمانہ اورآمرانہ اقدامات کے خلاف اپنے ظرف وضمیر کے مطابق آواز احتجاج بلندکریں۔جناب الطاف حسین نے بیان کے آخرمیں ایک مرتبہ پھر وزیراعظم میاں نوازشریف اوروزیراعلیٰ پنجاب میاں شہباز شریف سے انسانیت کے نام پر پرزوراپیل کی کہ وہ لاہورکی مقامی انتظامیہ ، پولیس حکام اوراداروں کولاہور اوردیگرعلاقوں میں کھڑے کئے گئے کنٹینرز،ٹرالرز اوردیگررکاوٹوں کو ہٹانے کے فوری احکامات جاری کریں تاکہ شہریوں کم ازکم یومیہ اجرت پر کام کرنے والے غریب مزدورایک وقت کی روزی روٹی کمانے کے قابل ہوسکیں۔