حق پرست رکن قومی اسمبلی طا ہرہ آصف پرحملہ ایک مرتبہ پھر پنجاب میں قائد تحریک الطاف حسین کے نظریہ حق پرستی کو دبانے کی سازش ہے،ڈاکٹر خالد مقبول صدیقی

لاہور ۔۔۔19جون2014ء

متحدہ قومی موومنٹ کی رابطہ کمیٹی کے ڈپٹی کنوینر ڈاکٹر خالد مقبول صدیقی نے کہا ہے کہ ایک مرتبہ پھر باطل قوتیں پنجاب کے عوام میں ایم کیوا یم کی مقبولیت اور حق پرستی کے بڑھتے ہوئے پیغا م سے خوفزدہ ہوگئی ہیں،دن دھاڑے ایم کیوا یم کی خاتون رکن قومی اسمبلی طا ہرہ آصف پر دہشتگردوں کی فائرنگ پنجاب میں قائد تحریک الطاف حسین کے نظریہ حق پرستی کو دبانے اور ایم کیوایم کے کارکنان کو خوفزدہ کرنے کی سازش کا حصہ ہے۔ انھوں نے طاہر ہ آصف پر دہشتگردوں کی جانب سے فائرنگ کی شدید الفاظ میں مذمت کرتے ہوئے واقعہ کو شرمناک قرار دیا ہے۔ان خیالات کا اظہار انھوں نے لاہور کے شیخ زید اسپتال میں پنجاب سے تعلق رکھنے والی حق پرست خاتون رکن قومی اسمبلی طاہرہ آصف کی عیاد ت کے بعد اسپتال کے باہر میڈیا نمائندگا ن کو بریفنگ دیتے ہوئے کیا ۔ اس موقع پر محترمہ طاہرہ آصف کے شوہر محمد آصف ، ایم کیوا یم رابطہ کمیٹی کے ارکا ن افتخار اکبر رندھاوا، خالد سلطان ، ایم کیوایم سینٹرل پنجاب کے ذمہ داران اور کارکنان کی بڑی تعداد انکے ہمراہ تھی ۔ ڈاکٹر خالد مقبول صدیقی نے کہا کہ طاہر ہ آصف کو گزشتہ کئی مہینوں سے دھمکیاں دی جارہی تھیں جس کے متعلق انھوں نے حکومت کوآگاہ کیاتھا مگر حکومت کی جانب سے انکی سیکورٹی کے لئے اقدامات نہیں کئے گئے،بحیثیت رکن قومی اسمبلی یہ طاہرہ آصف کا حق تھا کہ حکومت انکے خدشات کا فی الفور نوٹس لیکر انھیں موثر سیکورٹی فراہم کرتی جوکہ نہیں کیا گیا ۔انھوں نے مختلف حلقوں کی جانب سے افسوس ناک واقعے کو ڈکیتی یا چوری کا شاخشانہ قرار دینے کی سخت الفاظ میں مذمت کرتے ہوئے کہا کہ فائرنگ کے وقت حق پرست رکن قومی اسمبلی طاہرہ آصف کے ہمرا ہ انکی صاحبزادی بھی موجود تھیں اور دہشتگردوں سے طاہرہ آصف کی شناخت کرکے ان پر اندھا دھند فائرنگ شروع کردی لیکن ان سے یا انکی صاحبزادی سے اس وقت موجود موبائل فون ،زیورات یا نقدی سمیت کوئی بھی قیمتی سامان نہیں چھینا گیا جس سے صاف ظاہر ہوتا ہے کہ دہشتگردوں کا نشانہ صرف حق پرست رکن قومی اسمبلی طاہرہ آصف ہی تھیں۔ڈاکٹر خالد مقبول صدیقی نے ملک بھر کے عوام سے درد مندانہ اپیل کی کہ وہ حق پرست خاتون رکن قومی اسمبلی طاہرہ آصف کی جلد و مکمل صحتیابی کے لئے دعا کریں ۔اس موقع پر ڈاکٹر خالد مقبول صدیقی نے حکومت پنجاب سے مطالبہ کیا کہ وہ طاہرہ آصف پر فائرنگ کے افسوس ناک واقعے میں ملوث درندہ صفت دہشتگردوں کو گرفتار کرکے اس واقعے کے پیچھے چھپی گھناؤنی سازش کو بے نقاب کریں اور ذمہ داران کو قانون کے مطابق سزا دیں ۔

*****