سابق وفاقی وزیر داخلہ سینیٹر رحمن ملک کا ایم کیوایم کے قائد جناب الطاف حسین سے فون پر رابطہ

لندن۔۔ 5مئی 2014ء 

پیپلز پارٹی اوور سیز کے پریذ یڈنٹ اور سابق وفاقی وزیر داخلہ سینیٹر رحمن ملک نے ایم کیوایم کے قائد جناب الطاف حسین کو فون کر کے ان سے ایم کیوایم کے کارکنوں کے ماورائے عدالت قتل پر تعزیت کی ۔انہوں نے کہا کہ ان جواں سال کارکنوں کو جس بے رحمی سے قتل کیا گیا ہے اس پر انہیں ذاتی طو ر پر بہت دکھ پہنچا ہے اور وہ جناب الطاف حسین ،ایم کیوایم ،اسکے کارکنوں اور شہیدوں کے لواحقین کے غم میں برابر کے شریک ہیں ۔ انہوں نے جناب الطاف حسین کو یقین دلایا کہ حکومت سندھ ،ایم کیوایم کے کارکنوں کے قاتلوں کی گرفتاری میں کوئی کسر نہیں اٹھارکھے گی ۔ انہوں نے بتایا کہ سندھ حکومت نے ایم کیوایم کے کارکنوں کے قتل کی تحقیقات کیلئے خصوصی ٹیم تشکیل دے دی ہے جبکہ لاپتہ کارکنوں کی بازیابی کیلئے بھی اقدامات کئے جارہے ہیں ۔ انہوں نے کہا کہ حکومت سندھ کے علاوہ رینجرز اور دیگر قانون نافذ کرنے والے ادارے اس سانحہ کی تحقیقات کر رہے ہیں اور حکومت نے لاپتہ افراد کی بازیابی کیلئے بھی کیلئے کوششیں شروع کر دی ہیں ۔انہوں نے کہا کہ امید ہے کہ ایم کیوایم اپنے 72گھنٹے کے الٹی میٹم کو واپس لینے پر غور کرے گی ۔

جناب رحمن ملک نے جناب الطاف حسین کو ملک کی تازہ ترین سیاسی صورتحال سے بھی آگاہ کیا۔ انہوں نے کہا کہ اس وقت پاکستان 

جن داخلی وخارجی بحرانوں سے گزر رہا ہے اسکے پیش نظر ایم کیوایم اور پیپلز پارٹی کاساتھ چلنا پورے ملک خصوصاً صوبہ سندھ کیلئے بہت ضروری ہے ۔جناب الطاف حسین نے رحمن ملک سے کہا کہ ایم کیوایم کے لاپتہ کارکنوں کے اہل خانہ جس رنج وغم او ر کرب میں مبتلا ہیں اسے الفاظ میں بیان کرنا ممکن نہیں ۔ان لاپتہ کارکنان کی بازیابی سے ہی ان کے اہل خانہ کو سکون مل سکتا ہے ۔یہ حکومت کا اولین فرض ہے کہ وہ لاپتہ کارکنوں کو بازیاب کرائے اور ماورائے عدالت قتل کئے جانے والے کارکنوں کے قاتلوں کو گرفتار کرے ۔ جناب الطاف حسین نے اس موقع پر رحمن ملک کو پیپلز پارٹی اوورسیز کا پر یزیڈنٹ مقرر کئے جانے پر مبارکبا د بھی پیش کی ۔