ملک سے دہشت گردی کا سورج ہمیشہ کیلئے ہمارے اتحاد ، یکجہتی اور ایم کیوایم جیسی تنظیم کی کاوشوں سے غروب ہوجائے گا ، امین یوسف

کراچی :۔23؍ فروری 2014ء 

اظہار یکجہتی ریلی سے خطاب کرتے ہوئے پاکستان فیڈرل یونین آف جرنلسٹ کے سیکریٹری جنرل امین یوسف نے جناب الطاف حسین اور پوری ایم کیوایم کو مبارکباد پیش کرتے ہوئے کہاکہ ایک بار پھر ثابت کردیا گیا ہے کہ اس ملک میں بسنے والے چاہے ان کا تعلق کسی بھی طبقے ، مسلک سے ہو وہ امن چاہتے ہیں، بچوں کا مستقبل ، رات کو اچھی نیندچاہتے ۔ انہوں نے کہاکہ اس ملک سے انشاء اللہ تعالیٰ دہشت گردی کا سورج ہمیشہ کیلئے ہمارے اتحاد ، یکجہتی اور ایم کیوایم جیسی تنظیم کی کاوشوں سے غروب ہوجائے گا۔بشپ کوئٹہ و کراچی صاد ق ڈینیل نے کہا کہ ممکن ہے کہ کچھ غلط فہمیوں کی وجہ سے تضاد ، دوریاں اور نفرتیں پیدا ہوتی ہیں ، اگر غلط فہمیاں دو ر کرلی جائیں اور ہم سب مل کر اپنے ملک کی بہتری ، امن و سلامتی کیلئے کام کریں تو یقیناًہمارا ملک ایک خوبصورت ملک بن سکتا ہے ۔ انہوں نے مسلح افواج کو یقین دلاتے ہوئے کہاکہ دہشت گردی کے خلاف جہاں کہیں بھی ہماری ضرورت ہو ہر طریقے سے حاضر ہیں۔ انہوں نے ریلی کے انعقاد پر جناب الطاف حسین کو خراج تحسین پیش کیا اور کہا کہ فوج ، رینجرز ، پولیس اور حکومت پاکستان کیلئے سنجیدگی سے سوچتی ہے۔پولیٹیکل ایکٹیویسٹ جبران ناصرنے کہاکہ میں عام پاکستانی اور کنفوژڈ پاکستانی ہوں ، گھر بیٹھ کر طالبان کو برا بھلا کہنے والے ان کے خلاف مجمع میں آئیں اگر سیاسی جماعتیں ایک ساتھ جمع نہیں ہوئے دہشت گردی کے خلاف تو دہشت گرد زیر کردیں گے ۔ جناب الطاف حسین نے آج سب کو جمع کیا ہے ، آج کی ریلی پاک فوج ، پولیس ، آئی ایس آئی ، رینجرز کی ہے۔