اورنگی ٹاؤن میں فائرنگ سے اےاین پی کےعلاقائی صدرسمیت پانچ افرادکےقتل پررابطہ کمیٹی کااظہارمذمت

کراچی ۔۔۔20، فروری 2014ء 

متحدہ قومی موومنٹ کی رابطہ کمیٹی نے کراچی کے علاقے اورنگی ٹاؤن ایم پی آرکالونی میں مسلح دہشت گردوں کی جانب سے فائرنگ کرکے عوامی نیشنل پارٹی کے علاقائی صدرسمیت پانچ افرادکوہلاک کرنے کی شدیدالفاظ میں مذمت کی ہے اوراسے پولیس وقانون نافذکرنیوالے اداروں کی نااہلی وناکامی قراردیاہے۔ایک بیان میں رابطہ کمیٹی نے کہاکہ کراچی میں جاری ٹارگٹڈ آپریشن کے باوجودقتل وغارت گری کے تیز ی سے بڑھتے ہوئے واقعات لمحہ فکریہ ہیں اورپولیس وقانون نافذکرنیوالے اداروں کی کارکردگی پر سوالیہ نشان ہے؟۔ رابطہ کمیٹی نے کہاکہ ایک جانب کارکنان کی سیاسی بنیادوں پرگرفتارکرکے بہیمانہ تشددکانشانہ بنایاجارہاہے اوردوسری جانب معصوم شہریوں اور سیاسی کارکنان کوقتل وغارتگری کا نشانہ بنایا جارہا ہے، عوامی نیشنل پارٹی کے علاقائی صدرسمیت پانچ افرادکابہیمانہ قتل بھی اسی سلسلے کی کڑی ہے جس کی جتنی بھی مذمت کی جائے کم ہے۔رابطہ کمیٹی نے اے این پی کے علاقائی سمیت تمام افرادکے سوگوارلواحقین سے دلی تعزیت وہمدردی کااظہارکرتے ہوئے انہیں صبرکادامن تھامے رکھنے کی تلقین کی ۔رابطہ کمیٹی نے وزیراعظم میاں محمد نوازشریف،وفاقی وزیرداخلہ چوہدری نثارعلی،گورنرسندھ ڈاکٹرعشرت العباد اوروزیراعلیٰ سندھ سیدقائم علی شاہ سے مطالبہ کیاکہ اورنگی ٹاؤن ایم پی آرکالونی میں دہشت گردوں کی جانب سے فائرنگ کرکے پانچ افرادکوہلاک میں ملوث دہشت گردوں اوران کے سرپرستوں کوگرفتارکرکے عبرتناک سزادی جائے۔