ایم کیوایم سے وضاحت مانگنے کے بجائے شاہ محمود قریشی اس بات کی وضاحت کریں کہ وہ طالبان جو پاکستان، اسکے آئین اور ریاست کو نہیں مانتے، تحریک انصاف ان طالبان کی حمایت کیوں کررہی ہے؟

کراچی ۔۔۔ 4 جنوری 2014ء

متحدہ قومی موومنٹ کے رکن قومی اسمبلی نبیل گبول نے تحریک انصاف کے رہنما شاہ محمود قریشی کے ایم کیوایم اور قائد تحریک الطاف حسین کے بارے میں بیان پر تبصرہ کرتے ہوئے کہاہے کہ ایم کیوایم سے وضاحت مانگنے کے بجائے شاہ محمود قریشی قوم کے سامنے اس بات کی وضاحت کریں کہ وہ طالبان جو پاکستان، اس کے آئین اورریاست کونہیں مانتے، جومسلح افواج کی تنصیبات، ہیڈ کوارٹرز، چیک پوسٹوں اور قافلوں پر حملے کررہے ہیں، جو سفاک دہشت گرد پاکستان کی فوج، ایف سی، سیکوریٹی فورسزاورپولیس کے افسروں اور جوانوں کے گلے کاٹ رہے ہیں اور ان کے سروں سے فٹبال کھیل رہے ہیں تحریک انصاف ان سفاک طالبان کی حمایت کیوں کررہی ہے؟ وہ کالعدم تنظیمیں جومساجد،امام بارگاہوں اور مزارات پر حملے کررہی ہیں اورفرقہ وارنہ قتل عام کررہی ہیں ،تحریک انصاف ان کی حمایت کیوں کررہی ہے؟ نبیل گبول نے کہاکہ یہ کیسا مذاق ہے کہ مہاجروں کے جائزآئینی وقانونی حقوق کی بات کرنے پر شاہ محمود قریشی اورتحریک انصاف کے رہنما ایم کیو ایم پر تو بیجا تنقید کرر ہے ہیں لیکن وہ عناصر جوسندھ کوپاکستا ن سے الگ کرناچاہتے ہیں ان کے بارے میں ایک لفظ کہنے کیلئے تیار نہیں بلکہ انکے ساتھ محبت وتعان کی پینگیں بڑھارہے ہیں لہٰذا ایم کیوایم سے وضاحت مانگنے کے بجائے شاہ محمود قریشی علیحدگی پسندوں کے بارے میں اپنی پوزیشن واضح کریں۔