مسلح دہشت گردوں کی فائرنگ سے ایم کیوایم لانڈھی سیکٹر کے کارکن عامر خان کے بہیمانہ قتل پر رابطہ کمیٹی کا اظہار مذمت
جو عناصر ایم کیوایم کے بے گناہ کارکنان اور معصوم شہریوں کو دہشت گردی کا نشانہ بنا رہے ہیں وہ مسلمان تو کجا انسان کہلانے کے مستحق بھی نہیں ہیں
قتل میں ملوث دہشت گرد عناصر کو فی الفور گرفتار کرکے قانون کے کٹہرے میں لایا جائے۔ رابطہ کمیٹی کا حکومت سندھ سے مطالبہ
لندن۔۔۔۔02دسمبر2013
متحدہ قومی مومنٹ کی رابطہ کمیٹی نے مسلح دہشت گردوں کی فائرنگ سے ایم کیو ایم لانڈھی سیکٹر یونٹ 86کے کارکن عامریار خان کی ہلاکت پر شدید الفاظ میں مذمت کی ہے اور واقعہ کو کھلی دہشت گردی قرار دیا ہے ۔ ایک بیان میں رابطہ کمیٹی نے کہاکہ دہشت گرد عناصر منظم سازش کے تحت ایم کیوایم کے بے گنا ہ کارکنان اور معصوم شہریوں کو دہشت گردی کا نشانہ بنا رہے ہیں وہ مسلمان توکجا انسان کہلانے کے بھی مستحق نہیں ہیں۔ رابطہ کمیٹی نے کہاکہ شہید عامر یار خان خرم آباد میں اپنے گھر کے قریب نائی کی دکان پر بیٹھے تھے کہ اچانک موٹر سائیکل سوار مسلح دہشت گردوں نے ان پر فائرنگ کر دی جس کے نتیجے میں وہ شدید زخمی ہوگئے انہیں فوری طور پر ہسپتال لے جایا جارہا تھا لیکن زخموں کی تاب نہ لاتے ہوئے وہ راستے میں ہی اپنے خالق حقیقی سے جاملے ۔ انہوں نے کہا کہ ایسا لگتا ہے کہ شہر میں قانونی نام کی کوئی چیز نہیں ہے جہاں دہشت گرد نہ صرف آزادنہ طور پر گھو م رہے ہیں بلکہ معصوم شہریوں کو دہشت گردی کا نشانہ بنارہے ہیں جس کی جتنی مذمت کی جائے کم ہے ۔ رابطہ کمیٹی نے شہید عامر یار خان کے تمام سوگوار لواحقین سے دلی ہمدردی اور تعزیت کا اظہار کرتے ہوئے دعا کی کہ اللہ تعالی شہید کو جنت الفردوس میں اعلی مقام عطافرمائے اور سوگواران کو صبر جمیل عطا فرمائے ۔رابطہ کمیٹی نے وزیر اعلی سندھ قائم علی شاہ، گورنر سندھ ڈاکٹر عشرت العباد خان سے مطالبہ کیا کہ شہر میں جاری دہشت گردی کے واقعات کا فی الفور نوٹس لیں اور عامر یار خان کے قتل میں ملوث دہشت گرد عناصر کو فی الفو گرفتار کرکے قانون کے کہٹرے میں لایا جائے ۔