بجلی صارفین پر اربوںروپے کابوجھ ڈالنے کامنصوبہ سراسرظلم ہے ،ایم کیوایم رابطہ کمیٹی
بجلی کے صارفین کا معاشی قتل عام بند کرانے کیلئے مثبت اقدامات کیے جائیں
لندن۔۔۔6، نومبر2024ئ
متحدہ قومی موومنٹ کی رابطہ کمیٹی نے بجلی کے صارفین پر اضافی بوجھ ڈالنے اور بجلی کی قیمتوں میں اضافے کی اطلاعات پر گہری تشویش کااظہارکیا ہے ۔ ایم کیوایم انٹرنیشنل سیکریٹریٹ لندن سے جاری بیان میں رابطہ کمیٹی نے کہاکہ بجلی تقسیم کار کمپنیوں کی جانب سے بجلی کی قیمتوں میں اضافے کے لیے نیپرا میں درخواست جمع کرائی گئی ہے جس سے بجلی صارفین پراربوں روپے کا اضافی بوجھ پڑے گا۔ رابطہ کمیٹی نے کہاکہ ایک جانب ملک بھرکے عوام کو بھاری بلوں کی ادائیگی اور ڈیڈیکشن کی آڑمیں لوٹا جارہا ہے جبکہ دوسری جانب بھاری بلوں کی ادائیگی کے باوجودعوام کوبجلی کی غیراعلانیہ لوڈشیڈنگ کاعذاب جھیلناپڑرہا ہے جس کے باعث شہریوں کے معمولات زندگی بری طرح متاثر ہو رہے ہیں۔رابطہ کمیٹی نے کہاکہ ان حقائق کی روشنی میں بجلی تقسیم کارکمپنیوں کی جانب سے کیپیسٹی چارجز ، آپریشنز اینڈ میٹیننس ، سسٹم چارجز اور مارکیٹ آپریشنز فیس کی مد میں اوربجلی کی قیمتوں میں اضافے کیلئے نیپرا میں درخواست جمع دیکر بجلی صارفین پر اربوںروپے کابوجھ ڈالنے کامنصوبہ سراسر ناانصافی اورظلم ہے ۔رابطہ کمیٹی نے حکومت سے مطالبہ کیاکہ بجلی کے صارفین پر اضافی بوجھ ڈالنے اور بجلی کی قیمتوں میں اضافے کی اطلاعات کا فوری نوٹس لیاجائے، طویل دورانیے کی لوڈشیڈنگ اور بجلی کے صارفین کا معاشی قتل عام بند کرانے کیلئے عملی ، ٹھوس اورمثبت اقدامات بروئے کار لائے جائیں۔
٭٭٭