حیدرآباد میں گیس سلنڈر پھٹنے کے ہولناک واقعہ میں متعدد افراد کے جاں بحق اورزخمی ہونے پرایم کیوایم کے بانی وقائدجناب الطاف حسین کا اظہارافسوس
یہ واقعہ ایک سانحہ ہے۔ زخمیوں کے علاج معالجے پرخصوصی توجہ دی جائے۔ قائدتحریک الطاف حسین کامطالبہ
سانحے کے متاثرین کے غم میں برابرکاشریک ہوں۔الطاف حسین
ایم کیوایم کے وفاپرست نمائندے اورکارکنان سانحہ کے متاثرین کی ہرممکن مددکریں۔ الطاف حسین
لندن… 30 مئی 2024ئ
ایم کیوایم کے بانی وقائدجناب الطاف حسین نے حیدرآباد کے علاقے پریٹ آبادمیں گیس سلنڈر پھٹنے کے ہولناک واقعہ میں جھلسنے کے نتیجے میں متعدد افراد کے جاں بحق اورزخمی ہونے پر دلی افسوس کا اظہار کیا ہے ۔ اپنے بیان میں جناب الطاف حسین نے کہاکہ حیدرآباد سے ملنے والی اطلاعات کے مطابق گیس سلنڈر کے ہولناک حادثے میں 50 سے زائد علاقہ مکین جھلسے ہیں جن میں سے کئی افراد بری طرح جھلس چکے ہیں اوران کی حالت تشویشناک بتائی جاتی ہے۔ جناب الطاف حسین نے کہاکہ یہ واقعہ ایک سانحہ ہے جس میں اب تک متعدد افراد جاں بحق ہوچکے ہیں جن میں بچے بھی شامل ہیں۔ میں اس ہولناک واقعہ میں جاں بحق اورجھلسنے والے افراد کے اہل خانہ کے غم میں برابر کا شریک ہوںاور دعاکرتاہوں کہ اللہ تعالیٰ جاں بحق ہونے والوںکواپنی جوار رحمت میں جگہ عطافرمائے اور زخمیوںکوزندگی اور صحت عطا فرمائے ۔ جناب الطاف حسین نے ایم کیوایم حیدرآباد زون کے تمام وفاپرست نمائندوں اورکارکنوںکوہدایت کی کہ وہ حادثے کے متاثرین کی ہرممکن مددکریں۔ جناب الطاف حسین نے حکومت سے مطالبہ کیا کہ حادثے کے زخمیوں کے علاج معالجے پرخصوصی توجہ دی جائے۔
٭٭٭٭٭