ہزارہ ایکسپریس حادثے میں مسافروں کے جاں بحق اور زخمی ہونے پرانی وقائد الطاف حسین کا اظہارافسوس

لندن۔۔۔6، اگست2023ئ

متحدہ قومی موومنٹ کے بانی وقائد جناب الطاف حسین نے نواب شاہ کے قریب کراچی سے راولپنڈی جانے والی ہزارہ ایکسپریس کو پیش آنے والے حادثے کے نتیجے میںدرجنوں مسافروں کے جاں بحق اور زخمی ہونے پر گہرے دکھ اور افسوس کااظہارکیاہے ۔ایک بیان میں جناب الطاف حسین نے کہاکہ میڈیارپورٹس کے مطابق آج ہزارہ ایکسپریس کی دس بوگیاں ڈی ریل ہونے کے بعد الٹ گئیں جس کے نتیجے میں متعدد مسافر جاںبحق اور 50 سے زائد زخمی ہوئے ہیں ، ٹرین کے مسافروں اور مقامی شہریوں نے اپنی مدد آپ کے تحت زخمیوں کو بوگیوں سے نکال کراسپتال پہنچایا۔ انہوں نے کہاکہ پاکستان ایک ایٹمی طاقت ہے لیکن یہ امر انتہائی افسوسناک ہے کہ ملک میں قدرتی آفات، دہشت گردی یاحادثات سے نمٹنے اور حادثات کا شکار افراد کو ریسکیو کرنے کیلئے کسی قسم کے مؤثر انتظامات دیکھنے میں نہیں آتے، عوام اپنی مددآپ کے تحت امدادی سرگرمیوں میں حصہ لیتے ہیں اورسرکاری سطح پر بروقت امدادی سرگرمیاں نہ ہونے کے باعث بہت سی قیمتی جانیں ضائع ہوجاتی ہیں۔جناب الطاف حسین نے کہاکہ میں 2005ء کے قیامت خیز زلزلے کے بعد باربار بیان دیتا رہا ہوں کہ قدرتی آفات یا حادثات سے نمٹنے کیلئے پاکستان ڈیزاسٹر مینجمنٹ اتھارٹی(PDMA) کوانتہائی فعال بنایاجائے اوراس ادارے کے جوبھی افسران، شہریوں کی جان ومال کے تحفظ میں ذرہ برابر بھی غفلت کامظاہرہ کریں ان کے خلاف سخت ترین کارروائی کی جائے لیکن بدقسمتی سے پاکستان کے فرسودہ جاگیردارانہ نظام میںمعمولی غلطی پر غریب کو سزا دے دی جاتی ہے لیکن سنگین غلطیوں کے مرتکب سرکاری افسران ،بااثراوردولت مند افرادسے نہ باز پرس کی جاتی ہے اورنہ انہیں سزا دی جاتی ہے۔انہوں نے کہاکہ اگرسرکاری سطح پرمیری باربار کی جانے والی اپیلوں پر کان دھرا جاتا اور میری تجاویز پرعمل کرکے پاکستان ڈیزاسٹر مینجمنٹ اتھارٹی کو انتہائی فعال بنایاجاتا تو 2005ء کے بعد پاکستان میں قدرتی آفات، دہشت گردی اور حادثات میں بے شمار قیمتی جانوں کا زیاںہرگزنہ ہوتا۔ ایسا لگتا ہے کہ پاکستان ڈیزاسٹر مینجمنٹ اتھارٹی کو پاکستان ڈسٹرکشن مینجمنٹ اتھارٹی میں تبدیل کردیا گیاہے جس کا خمیازہ پاکستان کے عوام کو بھگتنا پڑرہا ہے ۔جناب الطاف حسین نے ہزارہ ایکسپریس کو پیش آنے والے حادثے میں جاں بحق افراد کے سوگوارلواحقین سے دلی تعزیت وہمدردی کااظہارکرتے ہوئے کہاکہ دکھ کی اس گھڑی میں مجھ سمیت ایم کیوایم کے تمام کارکنان وعوام آپ کے ساتھ ہیں اور سوگواران کے غم میں برابر کے شریک ہیںاور سوگواران سے دلی ہمدردی کااظہارکرتے ہیں۔ جناب الطاف حسین نے ٹرین حادثے میں زخمی ہونے والے افراد کی جلد اورمکمل صحت یابی کیلئے بھی دعا کی۔

٭٭٭٭٭