نجی نیوز چینل کے کیمرہ مین عمیر شاہ کو پولیس اہلکار کی جانب سے بہیمانہ تشدد کا نشانہ بنانے پر رابطہ کمیٹی کااظہار مذمت

ایم کیوایم رابطہ کمیٹی نے کیمرہ مین عمیر شاہ سے تشدد کے واقعہ پر دلی ہمدردی کااظہار کرتے ہوئے جلد ومکمل صحت یابی کیلئے دعا کی 

کراچی ۔۔۔6، نومبر2013ء 

متحدہ قومی موومنٹ کی رابطہ کمیٹی نے نجی نیوز چینل کے کیمرہ مین عمیر شاہ کو پولیس افسران کی موجودگی میں ایک پولیس اہلکار کی جانب سے بہیمانہ تشدد کا نشانہ بنائے جانے کی سخت ترین الفاظ میں مذمت کی ہے اور بہیمانہ تشدد کے اس واقعہ کو آزادی صحافت پر کھلا حملہ قرار دیا ہے ۔ ایک بیان میں رابطہ کمیٹی نے کہاکہ پولیس افسران کی موجودگی میں پولیس اہلکارنے عمیر شاہ کو جس بیدردی سے تشدد کا نشانہ بنایا اس کو دیکھ کر کوئی بھی ذی شعور شخص موقع پر موجود پولیس افسران کو بری الذمہ قرار نہیں دے سکتا ۔ رابطہ کمیٹی نے کیمرہ مین عمیر شاہ سے دلی ہمدردی کااظہار کیا اور ان کی جلد ومکمل صحت یابی کیلئے اللہ تعالیٰ کے حضور خصوصی دعا کی ۔ رابطہ کمیٹی نے وزیراعظم نواز شریف ، وفاقی وزیر داخلہ چوہدری نثار علی خان ،گورنر سندھ ڈاکٹر عشرت العباد اور وزیراعلیٰ سندھ سید قائم علی شاہ سے مطالبہ کیا کہ نجی نیوز چینل کے کیمرہ مین عمیر شاہ کو انسانیت سوز تشدد کا نشانہ بنائے جانے میں ملوث پولیس اہلکار کو فی الفور گرفتار کرکے قرار واقعی سزا دی جائے اورجن پولیس افسران کی موجودگی میں تشدد کا یہ افسوسناک اور قابل مذمت واقعہ رونما ہوا ہے ان کی قانون کے مطابق سخت گرفت کی جائے ۔