ایم کیوایم کے بانی و قائد الطاف حسین کی پشتون کونسل کینیڈاکے سینئر رہنماؤں سے ٹیلی فون پر گفتگو

لندن۔۔ 27اپریل 2018ء 

متحدہ قومی موومنٹ کے بانی و قائد جناب الطاف حسین نے کینیڈا کے شہر ٹورانٹو میں پشتون کونسل کینیڈاکے سینئر رہنماؤں سے ٹیلی فون پر گفتگوکی اور ان سے پشتونوں، مہاجروں اور دیگرمحروم ومظلوم قومیتوں کے خلاف جاری جبروستم اورپشتون تحفظ موومنٹ کی حالیہ تحریک کے حوالے سے تفصیلی تبادلہ خیال کیا۔ ان رہنماؤں میں پشتون کونسل کینیڈا کے روح رواں و سرپر ست پروفیسر سراج خان ، کینیڈا ہیومن لائر ز فورم کے صدرجہانگیر بخاری اور سوات سے تعلق رکھنے والے پشتون کونسل کے بورڈآف ڈائر یکٹر جاوید خان یوسف زئی شامل تھے ۔جناب الطاف حسین نے پشتون رہنماؤں سے گفتگوکرتے ہوئے کہاکہ وہ پشتونوں سمیت تمام مظلوم قومیتوں کااحترام کرتے ہیں اوریہ سمجھتے ہیں کہ تمام مظلوم قومیتوں کو برابرکاشہری سمجھتے ہوئے انہیں ان کے مساوی حقوق دیے جانے چاہئیں اورسب کے ساتھ مساوی سلوک کیاجاناچاہیے۔انہوں نے کہاکہ اپنے جائزحقوق کے لئے آوازاٹھانے والوں کوریاستی طاقت سے دبانے کاطرزعمل کسی بھی طرح مناسب نہیں۔ پشتون رہنماؤں نے جناب الطاف حسین کی جانب سے پشتونوں کی بھر پور حمایت اور اظہار یکجہتی کی کاوشوں کو سراہااورمظلوم قومیتوں کے باہمی اتحاد اور حقوق کی مشترکہ جدوجہد کو وقت کی اہم ضرورت قرار دیا ۔دونوں جانب سے متحدہو کر پرامن جدوجہد کو جاری رکھنے پر اتفاق کیاگیا۔ اس موقع پر پشتون رہنماؤ ں نے جناب الطاف حسین سے پشتون تحفظ موومنٹ کے کراچی میں ہونے والے جلسے کے سلسلے میں بھی تبادلہ خیال کیا اوراس سلسلے میں مشترکہ لائحہ عمل اختیار کرنے کے لئے تجاویز بھی پیش کیں۔یہ ٹیلی فونک گفتگو انتہائی خوشگوار ماحول میں ہوئی اور پشتون رہنماؤں نے جناب الطاف حسین کی جانب سے خیر سگالی کے جذبات کونہایت خوش آئند قرار دیتے ہوئے ان کا شکریہ ادا کیا ۔

*****