ایم کیوایم قصبہ علی گڑھ سیکٹریونٹ 131کے کارکن یاسر علی کوگھرسے گرفتارکرلیاگیا

لندن ۔۔۔ 9 فروری 2018ء

متحدہ قومی موومنٹ کی رابطہ کمیٹی نے ایم کیوایم قصبہ علی گڑھ سیکٹریونٹ 131کے کارکن یاسر علی کی غیرقانونی گرفتاری کی شدید مذمت کی ہے ۔اپنے بیان میں رابطہ کمیٹی نے کہاکہ جمعہ کی شب یاسر علی اپنے گھرپر اپنے اہل خانہ کے ساتھ موجود تھے کہ رینجرزاورسادہ لباس میں ملبوس اہلکاروں نے ان کے گھرپر بغیرکسی وارنٹ کے چھاپہ مارا، اہل خانہ کوہراساں کیااوریاسر علی کواپنے ساتھ لے گئے ۔یاسر کے اہل خانہ کویہ بھی نہیں بتایاگیاکہ یاسر کوکیوں حراست میں لیاگیاہے اورسکہاں لے جایاگیاہے۔ یاسرعلی کونامعلوم مقام پر منتقل کردیاگیاہے ۔ رابطہ کمیٹی نے یاسرعلی کی غیرقانونی گرفتاری کی شدیدالفاظ میں مذمت کرتے ہوئے کہا کہ ایم کیوایم کے خلاف ظالمانہ آپریشن بدستورجاری ہے اورایم کیوایم کے بے گناہ کارکنان جوتمام ترریاستی جبرکے باوجود قائدتحریک الطاف حسین سے جڑے ہوئے ہیں اور اپنے ظرف وضمیر کاسوداکرنے کیلئے تیار نہیں ہیں انہیں چن چن کرگرفتارکیاجارہاہے اورپکڑ پکڑ کرغائب کیاجارہاہے ۔ ایم کیوایم کے بزرگ رہنما ڈاکٹر حسن ظفر عارف کے ماورائے عدالت قتل کے ساتھ ساتھ گزشتہ چند روز کے دوران فیڈرل بی ایریاسے کارکن زائرآرائیں اور کورنگی سے رابطہ کمیٹی کے سابق رکن اکرم راجپوت کوگھرسے جبکہ رابطہ کمیٹی کے سابق رکن اشرف نورکوعدالت میں پیشی کے بعد عدالت کے باہرسے گرفتارکرلیاگیا، ان تینوں کارکنوں کو تاحال کسی عدالت میں پیش نہیں کیاگیاہے اورنہ ہی ان کی گرفتاری کی باقاعدہ طورپر تصدیق کی گئی ہے اورآج قصبہ علی گڑھ سیکٹرکے کارکن یاسر علی کوبھی گھر سے گرفتار کرلیا گیا ہے۔ رابطہ کمیٹی نے چیف جسٹس سپریم کورٹ جسٹس ثاقب نثارسے اپیل کی کہ وہ جہاں دیگر چیزوں کاازخودنوٹس لے رہے ہیں وہیں ایم کیو ایم کے بے گناہ کارکنوں کی غیرقانونی گرفتاریوں اورانہیں لاپتہ کرنے کے سنگین معاملے کابھی فوری نوٹس لیں اورایم کیوایم کے تمام لاپتہ کارکنوں کوفی الفور بازیاب کرائیں ۔ رابطہ کمیٹی نے انسانی حقوق کی تنظیموں سے بھی اپیل کی کہ وہ سیاسی کارکنوں کوپکڑکرلاپتہ کرنے اورانسانی حقوق کی سنگین خلاف ورزیوں کے معاملے پر آوازاحتجاج بلندکریں۔ 

****