سانحہ حیدر آباد 30 ستمبر 1988ء کے شہداء کی پچیسویں برسی لندن میں بھی منائی گئی

لندن ۔۔۔30ستمبر2013ء

سانحہ حیدرآباد30ستمبر1988ء کے شہداء کی پچیسویں برسی لندن میں بھی منائی گئی ۔ اس موقع پر ایم کیوایم انٹرنیشنل سیکریٹریٹ میں سانحہ حیدرآبادکے شہداء کیلئے فاتحہ خوانی کی گئی ۔ فاتحہ خوانی میں ایم کیوایم کی رابطہ کمیٹی کے ارکان، لندن کے دورے پر آئے ہوئے رابطہ کمیٹی کے ارکان کنورنوید،قومی اسمبلی میں پارٹی کے پارلیمانی لیڈرڈاکٹرفاروق ستار،سینیٹ میں پارلیمانی لیڈر سینیٹربابرغوری، ارکان قومی وصوبائی اسمبلی وسیم حسین،عادل صدیقی ،زبیراحمد،سیکریٹریٹ کے ارکان اوریوکے یونٹ کے ذمہ داران وکارکنان نے شرکت کی۔ اس موقع پر رابطہ کمیٹی کے ڈپٹی کنوینرندیم نصرت نے خطاب کرتے ہوئے کہاکہ 30ستمبر1988ء کو حیدرآبادکے سینکڑوں معصوم وبیگناہ شہریوں کاقتل عام ایک سانحہ ہے جسے فراموش نہیں کیاجاسکتا۔30ستمبر1988ء کوحیدرآبادمیں سینکڑوں بے گناہوں کو بیدردی سے شہیدکردیاگیالیکن اس قتل عام میں ملوث سفاک قاتلوں کوآج تک سزانہیں دی گئی ۔ ندیم نصرت نے کہاکہ ایم کیوایم کے کارکنوں کایہ عہدہے کہ وہ شہداء کی ان قربانیوں کورائیگاں نہیں جانے دینگے اوراپنی منزل کے حصول تک اپنی جدوجہدجاری رکھیں گے۔ اس موقع پر دیگرذمہ داران نے بھی سانحہ حیدرآبادمیں پیش آنے والے واقعات پرروشنی ڈالی۔اس موقع پرسانحہ حیدرآباد اورتحریکی جدوجہد کے دوران مختلف سانحات اورواقعات کے تمام شہداکوخراج عقیدت پیش کیاگیااوران کیلئے فاتحہ خوانی کی گئی اورقائدتحریک الطاف حسین کی قیادت میں تحریک کی کامیابی کیلئے خصوصی دعائیں کی گئیں۔