سینٹرل جیل میں ایم کیوایم کے اسیرکارکن محمدحسین گھانچی کی ہلاکت کے واقعہ کی اعلیٰ سطحی تحقیقات کرائی جائے ۔ندیم نصرت

متحدہ قومی موومنٹ کی رابطہ کمیٹی کے کنوینرندیم نصرت نے ایم کیوایم لیاری ٹاؤن کے اسیرکارکن محمدحسین گھانچی کی جیل میں ہلاکت کے واقعہ کی شدید مذمت کی ہے اوراس واقعہ کی اعلیٰ سطحی تحقیقات کامطالبہ کیاہے ۔اپنے بیان میں ندیم نصرت نے کہاکہ محمدحسین گھانچی کودوسال قبل رینجرزنے گرفتارکیاتھا اورکئی روز تک سرکاری حراست میں بہیمانہ تشددکانشانہ بنانے کے بعدمختلف مقدمات میں ملوث کرکے جیل منتقل کردیاتھاآج محمدحسین گھانچی کوجیل انتظامیہ کے اہلکارمردہ حالت میں اسپتال لے کرآئے اوراسپتال میں چھوڑ کرچلے گئے ۔ اطلاعات کے مطابق محمدحسین کاانتقال جیل میں ہی ہوچکاتھااورجیل انتظامیہ نے اپنی جان بچانے کے لئے محمدحسین کومردہ حالت میں اسپتال منتقل کردیا۔محمدحسین شادی شدہ تھے اوران کے سات بچے ہیں۔ ندیم نصرت نے واقعہ کی شدیدمذمت کرتے ہوئے کہاکہ یہ سرکاری حراست میں ایم کیوایم کے ایک اورکارکن کاقتل ہے ،اس سے قبل بھی ایم کیوایم کے کئی کارکنوں کوسرکاری حراست اورجیل میں تشدداوربہیمانہ سلوک کانشانہ بناکرماورائے عدالت قتل کیاجاچکاہے۔ ندیم نصرت نے کہاکہ جیل میں محمدحسین کی ہلاکت کا یہ واقعہ ایم کیوایم کے کارکنوں کے ماورائے عدالت قتل کاتسلسل ہے ،مہاجرکارکنوں کوچن چن کرگرفتارکیاجارہاہے ، انہیں لاپتہ کیاجارہاہے ، سرکاری حراست میں سفاکانہ تشددکانشانہ بناکرماورائے عدالت قتل کیاجارہاہے جوسراسرظلم ہے ۔ ندیم نصرت نے سپریم کورٹ کے چیف جسٹس جناب جسٹس ثاقب نثارسے اپیل کی کہ محمدحسین کی جیل میں ہلاکت کے واقعہ کی اعلیٰ سطحی تحقیقات کرائی جائے اوراس کے ذمہ دار اہلکاروں کے خلاف سخت کارروائی کی جائے ۔ ندیم نصرت نے انسانی حقوق کی تنظیموں سے بھی اپیل کی
کہ وہ اس واقعہ کافوری نوٹس لیتے ہوئے اس ظلم کے خلاف صدائے احتجاج بلندکریں۔