ایم کیوایم یوکے کی جانب سے پشاور کے چرچ میں خود کش دھماکوں کی پر زور مذمت اور دہشت گردوں کی گرفتاری کا مطالبہ

لندن ۔۔۔22، ستمبر2013ء

ایم کیوایم برطانیہ کی آرگنائزنگ کمیٹی کے انچارج ڈاکٹرسلیم دانش کی سربراہی میں ایم کیوایم برطانیہ کے تمام ذمہ داروں کا ہنگامی اجلاس ہوا جس میں پشاور چرچ میں خود کش بم دھماکوں کی بھر پور مذمت کی گئی اور بم دھماکے میں ہلاک ہونے والوں کے لواحقین سے دلی تعزیت وہمدردی کا اظہار کیا گیا اور زخمیوں کی صحت یابی کیلئے دعا کی گئی۔ اجلاس میں حکومت پاکستان سے مطالبہ کیا گیا کہ وہ چرچ میں خود کش حملوں میں ملوث انسانیت دشمن دہشت گردوں کے خلاف فوری کارروائی کرے اور ملوث دہشت گردوں کو گرفتار کرکے عبرتناک سزا دی جائے ۔ 

ایم کیوایم کے قائد جناب الطاف حسین کی ہدایت پر ایم کیوایم یوکے کے انچارج ڈاکٹر سلیم دانش نے برطانیہ میں کرسچن کمیونٹی کے رہنماؤں ، مختلف گرجا گھروں کے پادریوں اور ذمہ داروں سے بات کی اور ان سے پشاور سانحہ پر اظہار دلی ہمدردی اور یکجہتی کااظہار کیا اور ایم کیوایم کی جانب سے بھر پور تعاون کی پیشکش کی ۔ اس موقع پر ڈاکٹر سلیم دانش نے برمنگھم چرچ کمیٹی کے ذمہ دار شفیق انجم، نیلسن چرچ کمیٹی کے ذمہ دار اکمل لندن ، کرسچن کمیٹی کے رکن سکین خان سے بات کی اور قائد تحریک جناب الطاف حسین کی جانب سے سانحہ پشاور پر دلی تعزیت اور ہمدردی کاظہار کرتے ہوئے کہاکہ ایم کیوایم کے قائد جناب الطاف حسین اور ایم کیوایم کا ایک ایک کارکن عیسائی کمیونٹی کے دکھ میں برابر کا شریک ہے ۔