نشترپارک کے جلسہ میں عامرخان کی جانب سے لندن رابطہ کمیٹی کے ارکان پرلگائے گئے الزامات قابل مذمت ہیں۔ ترجمان متحدہ قومی موومنٹ

متحدہ قومی موومنٹ کے ترجمان نے آج نشترپارک کے جلسہ میں عامرخان کی جانب سے کی جانے والی تقریرمیں لندن رابطہ کمیٹی کے ارکان پرلگائے گئے الزامات کی شدیدالفاظ میں مذمت کی ہے ۔اپنے بیان میں ترجمان نے کہاکہ یہ بات نہ صرف ہمارے لئے بلکہ تحریک کے ایک ایک کارکن کیلئے انتہائی حیرت انگیز ہے کہ عامرخان آج قائدتحریک الطاف حسین کے وفادارساتھیوں پرہی ایم کیوایم کونقصان پہنچانے کابہتان لگارہے ہیں جوحقائق کوجھٹلانے کی ایک بھونڈی کوشش ہے ، ایم کیوایم کاایک ایک کارکن اورمہاجرقوم کا بچہ بچہ یہ حقیقت اچھی طرح جانتاہے کہ یہ عامر خان ہی تھے جنہوں نے 1991ء میں سرکاری ایجنسیوں کے ساتھ ملکرحقیقی بنائی اور 19جون 1992ء کوفوج کے ساتھ ملکر ایم کیوایم کے خلاف آپریشن شر وع کیا، جس کے دوران ایم کیوایم کے ہزاروں کارکن شہیداورہزار وں اپنے گھروں سے دربدرہوئے ، اگرعامرخان سرکاری ایجنسیوں کے ساتھ ملکرحقیقی نہ بناتے اورایم کیوایم کے خلاف آپریشن شروع نہ کراتے تونہ ہزار وں کارکن شہیدہوتے اورنہ قائدتحریک الطاف حسین اورتحریک کے سینکڑوں کارکنوں کوجلاوطن ہوناپڑتا۔ترجمان نے کہاکہ اپنے منہ سے شہیدوں کانام لیتے ہوئے عامرخان کواپنے گریبان میں جھانکناچاہیے کہ ان کی وجہ سے تحریک کے کتنے کارکن شہیدہوئے ۔ ترجمان نے کہاکہ یہ امر انتہائی افسوسناک ہے کہ عامرخان آج بھی 1992ء والاکرداردہرارہے ہیں،انہوں نے ماضی میں بھی قائدتحریک الطاف حسین کوتنہاکرنے کی کوشش کی تھی اور آج بھی وہ تحریک کے باوفا ساتھیوں کی ذات پرکیچڑ اچھال کراورانہیں مسلسل نشانہ بناکرقائدتحریک الطاف حسین کوتنہاکرنے کی کوششیں کررہے ہیں اور پی آئی بی میں بیٹھ کرتحریک کے کارکنوں کوقائدتحریک الطاف حسین کے خلاف ورغلارہے ہیں۔ ترجمان نے کہاکہ عامرخان نے مہاجرقوم پر ظلم وستم ڈھانے والی قوتوں کوللکارنے اوران پر تنقید کانشانہ بنانے کے بجائے آج ایک بارپھر جس طرح قائدتحریک الطاف حسین کے باوفاساتھیوں پر الزامات لگائے اور تنقید کے نشترچلائے ہیں اس سے ان کااصل چہرہ کارکنوں اورقوم کے سامنے آگیاہے۔