اظہار یکجہتی کیلئے بھوک ہڑتالی کیمپ کا دورہ کرنے والے وفود کے ارکان سے قائد تحریک الطاف حسین کا اظہار تشکر

لندن۔۔۔21، اگست2016ء

متحدہ قومی موومنٹ کے قائدجناب الطاف حسین نے ریاستی مظالم کے خلاف تادم مرگ بھوک ہڑتال کرنے والے ایم کیوایم کے رہنماؤں ، منتخب ارکان قومی وصوبائی اسمبلی اور مختلف شعبہ جات کے ارکان سے اظہاریکجہتی کیلئے بھوک ہڑتالی کیمپ کادورہ کرنے والے وفود کے ارکان سے دلی تشکرکااظہارکیا ہے ۔ تادم مرگ بھوک ہڑتال کے پانچویں روز، بھوک ہڑتالی کیمپ کے شرکاء سے ٹیلی فون پر بات چیت کرتے ہوئے جناب الطاف حسین نے کہاکہ آج بھی مختلف سیاسی ،سماجی جماعتوں اور ادبی شخصیات کے علاوہ مختلف مکاتب فکرکے علمائے کرام نے بھوک ہڑتالی کیمپ کا دورہ کیا جبکہ حیدرآباد، میرپورخاص، ٹنڈوالہیار، ٹھٹھہ اور دیگرشہروں سے بھی خواتین اور مردوں کے وفود نے بھوک ہڑتالی کیمپ پہنچ کر ایم کیوایم سے دلی یکجہتی کامظاہرہ کیا ہے جس پر میں تمام وفود میں شامل ایک ایک فرد کا شکریہ ادا کرتا ہوں۔ جناب الطاف حسین نے کہاکہ آج دن بھر ایم کیوایم کے بھوک ہڑتالی کیمپ میں جس طرح وفود کی آمد کا سلسلہ جاری رہا اور وفودکے ارکان نے جس طرح جرات مندی کے ساتھ ایم کیوایم سے یکجہتی کا اظہار کیا وہ مظلوم مہاجروں کیلئے بہت حوصلہ افزاء ہے۔ انہوں نے کہاکہ اسٹیبلشمنٹ ، ایم کیوایم کو ختم کرنے کی سازشیں کررہی تھی لیکن اللہ تعالیٰ کے فضل وکرم اور حق پرست شہداء کی قربانیوں کی بدولت ایم کیوایم مزیدمضبوط ہوتی گئی اور آج ایم کیوایم کی مقبولیت کئی گنا زیادہ بڑھ چکی ہے ۔جناب الطاف حسین نے کہاکہ ریاستی مظالم کے خلاف تادم مرگ بھوک ہڑتال کرنے والے ساتھیوں کی باربار طبیعت خراب ہورہی ہے لیکن اس کے باوجود وہ ہمت و حوصلے، جدوجہد کی کامیابی اور حق پرست شہداء کی قربانیوں کی قدرکرتے ہوئے نہ صرف پرامن احتجاج پر ڈٹے ہوئے ہیں جس پر میں ایک ایک ساتھی کو دل کی گہرائیوں سے زبردست خراج تحسین پیش کرتا ہوں۔ جناب الطاف حسین نے بھوک ہڑتالی کارکنان کو دن رات طبی امدادکی فراہمی اوردیکھ بھال پر ایم کیوایم میڈیکل ایڈکمیٹی ، پیرامیڈیکل اسٹاف اور لیب ٹیکنیشنزکو بھی زبردست شاباش اور خراج تحسین پیش کیا۔ جناب الطاف حسین نے بھوک ہڑتالی کارکنان سے اظہاریکجہتی کیلئے آنے والے بزرگوں ، خواتین ، نوجوانوں اور معصوم بچے بچیوں کوبھی اپناپیار دیتے ہوئے خراج تحسین پیش کیا۔
تصاویر