یوم آزادی کے موقع پرکراچی میں اسٹریٹ کرائمز، لوٹ مار اور خواتین سے بدتمیزی کے واقعات کا نوٹس لیاجائے، رابطہ کمیٹی

کراچی ۔۔۔14، اگست2016ء

متحدہ قومی موومنٹ کی رابطہ کمیٹی نے سماج دشمن عناصر کی جانب سے کراچی کے مختلف علاقوں میں اسٹریٹ کرائمز، لوٹ مار اور خواتین سے بدتمیزی کے واقعات کی سخت ترین الفاظ میں مذمت کی ہے ۔ ایک بیان میں رابطہ کمیٹی نے کہاکہ ایک جانب کراچی میں قیام امن کی آڑ میں ایم کیوایم کو ٹارگٹ کیا جارہا ہے ، اس کے رہنماؤں ، منتخب نمائندوں اور کارکنوں کے گھروں پر چھاپے اور گرفتاریاں روزمرہ کا معمول بنادیاگیا جبکہ دوسری جانب جرائم پیشہ دہشت گردوں اور سماج دشمن عناصر کوکھلی چھوٹ دیدی گئی ہے ۔ رابطہ کمیٹی نے کہاکہ آج یوم آزادی کے موقع پر کراچی میں جگہ جگہ رینجرز اورپولیس کی تعیناتی کے باوجود جرائم پیشہ عناصر کھلے عام دندناتے رہے ، شہریوں سے لوٹ مارکرتے رہے اور فائرنگ کرکے شہریوں کو ہلاک وزخمی کرتے رہے۔ جرائم پیشہ عناصر نے شہرکے مختلف علاقوں میں اسلحہ کے زور پردرجنوں موٹرسائیکلیں، موبائل فون اورنقدی چھین لی اور دن بھر لوٹ مارکرتے رہے ۔ جشن آزادی کے موقع پرکراچی کے تفریحی مقامات پرجانے والی فیملیزکو بدسلوکی کا نشانہ بناگیا اورکھلے عام خواتین سے بدتمیزی کی جاتی رہی لیکن ان جرائم پیشہ اورسماج دشمن عناصر کو روکنے اور شہریوں کو تحفظ دینے والا کوئی نہیں تھا۔ رابطہ کمیٹی نے کہاکہ ان تمام واقعا ت سے صاف ظاہر ہے کہ کراچی آپریشن کا مقصد قیام امن نہیں بلکہ کراچی کی واحدمنتخب نمائندہ جماعت ایم کیوایم کو ختم کرنا ہے جس کی جتنی بھی مذمت کی جائے کم ہے ۔ رابطہ کمیٹی نے وزیراعظم میاں محمد نوازشریف ، وفاقی وزیرداخلہ چوہدری نثارعلی خان اور وزیراعلیٰ سندھ مراد علی شاہ سے مطالبہ کیا کہ یوم آزادی کے موقع پر کراچی میں لوٹ مار، دہشت گردی اور خواتین سے بدتمیزی کے واقعات کا نوٹس لیاجائے اور کراچی میں دہشت گردی اور لوٹ مارکابازارگرم کرنے والے اصل جرائم پیشہ عناصر کے خلاف قانون کے مطابق کارروائی کی جائے ۔