کارکنان و ذمہ داران تعلیم حاصل کریں اور نقل سے پرہیز کریں ، الطاف حسین نے سالگرہ کے اجتماع میں عہد لے لیا

کراچی ۔۔۔17، ستمبر2013ء 

متحدہ قومی موومنٹ کے قائد جناب الطاف حسین نے ایم کیوایم کے کارکنان اور ذمہ داران سے عہد لیا کہ وہ تعلیم حاصل کریں اور نقل سے پرہیز کریں ، خواتین ، والدین ، استادوں کادل سے احترام کریں ۔ وہ منگل کی شام جناح گراؤنڈ عزیز آباد میں اپنی سالگرہ کے 60ویں مرکزی اجتماع سے ٹیلی فونک خطاب کررہے تھے ۔ جناب الطاف حسین نے کہاکہ جب میں یہ سنتا ہوں کہ طالب علم بعض استادوں کے گریبان پر ہاتھ ڈال رہے ہیں تو میرا سر شرم سے جھک جاتا ہے کہ کسی طالب علم کی ہمت کیسے ہوسکتی ہے کہ وہ استاد پر ہاتھ ڈال دے ۔ انہوں نے کہا کہ ہم تو ایسا کرنے کا سوچ بھی نہیں سکتے ۔ انہوں نے کارکنان سے خدا رسول ؐ کے واسطے یہ بھی اپیل کی کہ وہ پان پراکھ ، زہریلے گٹکے کھانا چھوڑ دیں ۔ انہوں نے نوجوانوں سے اپیل کی کہ وہ محنت نہیں کرسکتے تو بھیک مانگ لیں لیکن سڑک پر موبائل چھیننا اور چوری کی وارداتیں کرنا ختم کردیں ۔