رینجرز کو صرف کراچی میں آپریشن کیلئے اختیارات دینا کراچی کے شہریوں کے ساتھ جاری متعصبانہ سلوک کا تسلسل ہے۔ ندیم نصرت، کنوینر ایم کیوایم

لندن ۔۔۔ 3 اگست 2016ء

متحدہ قومی موومنٹ کے کنوینر ندیم نصرت نے کہاہے کہ رینجرز کوصرف کراچی میں آپریشن کے لئے اختیارات دیناکراچی کے شہریوں کے ساتھ جاری متعصبانہ سلوک کا تسلسل ہے ۔ سندھ میں رینجرزکے اختیارات کے معاملے پر اپنے ایک بیان میں انہوں نے کہاکہ پورا ملک جانتا ہے کہ اندرون سندھ کے بیشترعلاقوں میں ہمیشہ سے ڈاکوؤں اورپتھاریداروں کاراج رہاہے جس کی وجہ سے شام کواندرون سندھ کے کسی بھی علاقے یاشاہراہ پر لوگوں کانکلنا ناممکن ہے،لہٰذا رینجرز کی زیادہ ضرورت تووہاں ہے لیکن اس صورتحال سے نمٹنے کیلئے حکومت نے پولیس سے کام لیا ہے۔ اگرآج بھی حکومت سندھ یہ سمجھتی ہے کہ وہ پورے سندھ میں دہشت گردوں، ڈاکوؤں، پتھاریداروں، اغوابرائے تاوان کی وارداتیں کرنے والوں اورجرائم پیشہ عناصر سے پولیس کے ذریعے ہی نمٹ سکتی ہے اورباقی سندھ میں رینجرز کی ضرورت نہیں ہے تو پھر صرف کراچی میں رینجرزکو آپریشن کا اختیار کیوں دیا جارہا ہے؟ اگر سندھ بھرمیں پولیس ہی کارروائی کرسکتی ہے تو پھر کراچی میں بھی امن وامان کے قیام کے لئے پولیس سے ہی کام کیوں نہیں لیاجاسکتا؟ ندیم نصرت نے کہاکہ رینجرز کوصرف کراچی میں آپریشن کیلئے اختیارات دیناکراچی کے شہریوں کے ساتھ جاری متعصبانہ سلوک کاتسلسل ہے۔انہوں نے کہاکہ کراچی کے لئے اس طرح کے مسلسل یکطرفہ اورمتعصبانہ فیصلے کے ذریعے حکومت سندھ خود ہی اس بات کوتسلیم کررہی ہے کہ وہ کراچی کو سندھ سے الگ تصورکرتی ہے ۔کراچی کے بارے میں اس طرح کی متعصبانہ پالیسیاں اور متعصبانہ طرزعمل کراچی کو علیحدہ صوبہ کامطالبہ کرنے کی جانب دھکیل رہاہے۔ ندیم نصرت نے کہاکہ آج کراچی اورسندھ کے شہری علاقوں کاہرفرد یہ سمجھنے پر مجبورہے کہ چاہے حکومت سندھ ہویاوفاقی حکومت، ان کے ساتھ دونوں ہی متعصبانہ سلوک کررہے ہیں اورانہیں دیوارسے لگایا جارہاہے ۔ انہوں نے مطالبہ کیاکہ کراچی اورسندھ کے شہری علاقوں کے ساتھ نفرت وتعصب کایہ سلوک بند کیاجائے ۔