رابطہ کمیٹی کے رکن واسع جلیل کا رینجرز کی جانب سے انسانی حقوق کی خلاف ورزیوں کے واقعات پر ایمنسٹی انٹرنیشنل کے نمائندوں سے رابطہ

لندن۔۔۔21، جولائی2016ء

کراچی میں پیراملٹری رینجرز کی جانب سے ایم کیوایم کے رہنماؤں ،منتخب نمائندوں اورکارکنوں کی غیرقانونی گرفتاریوں، ماورائے عدالت قتل اور انسانی حقوق کی خلاف ورزیوں کے مسلسل واقعات سے پاکستان سمیت دنیا بھر میں انسانی حقوق کی تنظیموں کو آگاہ کیاجارہا ہے اور اس سلسلے میں ایم کیوایم کے رہنماؤں کی جانب سے انسانی حقوق کی ملکی وبین الاقوامی تنظیموں کے نمائندوں سے رابطوں کا سلسلہ جاری ہے ۔ تفصیلات کے مطابق ایم کیوایم کی رابطہ کمیٹی کے رکن واسع جلیل نے رینجرز کی جانب سے ایم کیوایم کے رہنماؤں ، منتخب عوامی نمائندوں اورکارکنوں کی گرفتاریوں کے واقعات پر ایمنسٹی انٹرنیشنل کے نمائندوں سے رابطہ کیا اور انہیں نامزد میئر کراچی وسیم اختر، حق پرست رکن سندھ اسمبلی عبدالرؤف صدیقی کی گرفتاری اور ایم کیوایم لانڈھی کے لاپتہ کارکن ریاض الحق کے ماورائے عدالت قتل کے واقعات سے آگاہ کیا۔ 

ایمنسٹی انٹرنیشنل کی جانب سے ایم کیوایم کے رہنماؤں،منتخب نمائندوں اورکارکنوں کی گرفتاریوں، ان کے ماورائے عدالت قتل اور انسانی حقوق کی خلاف ورزیوں پر تشویش کا اظہار کیا گیا۔ ایمنسٹی انٹرنیشنل کے نمائندوں نے کہاہے کہ زیرحراست افراد کے انسانی حقوق کا احترام کیاجانا چاہیے۔ ایم کیوایم کی جانب سے مہاجروں کے انسانی حقوق کی خلاف ورزیوں کے واقعات پر پاکستان سمیت دنیا بھر میں انسانی حقوق کی تنظیموں سے رابطو ں کا سلسلہ جاری ہے ۔