ایم کیو ایم یو ایس اے اور کینیڈا کی اورلینڈومیں ہونے والے دہشت گردی کے افسوسناک سانحہ کی سخت الفاظ میں مذمت

لندن۔۔13جون2016ء

ایم کیو ایم یو ایس اے اور کینیڈا نے اورلینڈومیں ہونے والے دہشت گردی کے افسوسناک سانحہ کی سخت الفاظ میں مذمت کی ہے اورمرنے والوں کے لواحقین سے اظہار یکجہتی کے لئے تین روز کے لئے اپنی تمام سیاسی اور تنظیمی سرگرمیوں کو معطل کرنے کا اعلان کیا ہے۔اورلینڈو میں دہشت گردی کے دل دہلادینے والے اس واقعہ نے انسانیت پر یقین رکھنے والے ہر فرد کو غمگین کردیا ہے۔ اسلام کے نام پر ہونے والے دہشت گردی کے واقعات اسلام کے امن ، پیار اور اخوت کے فلسفہ کی بدنامی کا باعث بن رہے ہیں۔ مذہبی انتہا پسندی کے باعث دہشت گردی کے بڑھتے ہوئے واقعات پوری دنیا خاص طور پر امریکہ کے مسلمانوں کے لئے مشکلات میں اضافے کا باعث بن رہے ہیں۔ ایم کیو ایم کے کارکنان، اورلینڈو میں ہونے والے دہشتگردی کے اس واقعہ پر امریکی عوام کے غم میں برابر کے شریک ہیں ۔ ایم کیو ایم یو ایس اے اور کینیڈا کے زیر اہتمام امریکہ اور کینیڈا کے مختلف شہروں میں اس افسوسناک واقعہ میں ہلاک ہونے والوں کی یاد میں شمعیں روشن کی جائیں گی۔