خواتین تمام شعبہ ہائے زندگی میں بھرپور کردارادا کررہی ہیں اور کسی بھی معاشرہ کی ترقی میں خواتین کا اہم کردار رہا ہے اور یہی وجہ ہے کہ خواتین کی ترقی معاشرے کی ترقی کے لئے لازم و ملزوم ہے۔ کشور زہرا

کراچی ۔۔۔ 12؍ جون 2016ء 

حق پرست رکن قومی اسمبلی و انچارج ایم کیو ایم شعبہ خواتین کشور زہرا اور حق پرست رکن سندھ اسمبلی نائلہ لطیف نے جمعیت علماء اسلام کے سینیٹر حاجی حمداللہ کی جانب سے نجی ٹی وی کے لائیو پروگرام میں نامور سماجی کارکن ماروی سرمد کی ہرزہ سرائی کی شدید الفاظ میں مذمت کی ہے۔ اپنے ایک مشترکہ بیان میں انہوں نے کہا کہ آج خواتین تمام شعبہ ہائے زندگی میں بھرپور کردار ادا کرررہی ہیں اور کسی بھی معاشرہ کی ترقی میں خواتین کا اہم کردار رہا ہے اور یہی وجہ ہے کہ خواتین کی ترقی معاشرے کی ترقی کے لئے لازم و ملزوم ہے۔ انہوں نے کہا کہ اس قسم کی سوچ کی وجہ سے ہی پاکستان میں خواتین پر تشدد، انہیں زندہ جلانے، عزت کے نام پر قتل سمیت دیگر خواتین پر طرح طرح کے مظالم کئے جارہے ہیں اور اس قسم کے واقعات دنیا میں پاکستان کی بدنامی کا باعث بن رہے ہیں۔ انہوں نے کہا کہ ریاست پاکستان کے ایک سینیٹر کی جانب سے خواتین کے خلاف اس قسم کی نازیبا زبان اور لہجے کا استعمال کرنا اور خواتین کے خلاف تشدد کو فروغ دینے کے مترادف ہے۔ انہوں نے کہا کہ چیئرمین سینٹ رضا ربانی ان کے ایک سینیٹر کی جانب سے لائیو شو میں خاتون کے ساتھ بدتمیزی کا نوٹس لے جس کے باعث دنیا بھر میں پاکستان اور ہاکستان کے قانون ساز اداروں کی تذلیل ہوئی ہے۔