سندھ اسمال انڈسٹری کارپوریشن کے ملازمین کو جلد سے جلد تنخواہیں اور پنشن ادا کی جائیں، ندیم نصرت
سندھ اسمال انڈسٹری کارپوریشن کے ملازمین گزشتہ کئی ماہ سے اپنی تنخواہوں اور پنشن سے محروم ہیں ،ندیم نصرت
تنخواہوں کی عدم فراہمی کے باعث ہزاروں خاندان شدید مالی مشکلات کا شکار ہیں، ندیم نصرت
سندھ اسمال انڈسٹری کارپوریشن کی سالانہ گرانٹ فی الفور منظور کی جائے، ندیم نصرت
لندن۔۔۔5، جون2016ء
متحدہ قومی موومنٹ کی رابطہ کمیٹی کے کنوینر ندیم نصرت نے مطالبہ کیا ہے کہ محکمہ سندھ اسمال انڈسٹری کارپوریشن کے ملازمین کو جلد سے جلد تنخواہیں اور پنشن ادا کی جائیں ۔ ایک بیان میں ندیم نصرت نے کہاکہ سندھ اسمال انڈسٹری کارپوریشن کے ملازمین گزشتہ کئی ماہ سے اپنی تنخواہوں اور پنشن سے محروم ہیں ، حق پرست ارکان سندھ اسمبلی کی جانب سے سندھ اسمبلی کی اسٹینڈنگ کمیٹی اور ایوان میںیہ معاملہ اٹھایاجاتارہا ہے لیکن پیپلزپارٹی کی متعصب صوبائی حکومت نے اس خالص انسانی مسئلہ کو حل کرنے کے بجائے سردخانے کی نذرکررکھاہے ۔ انہوں نے کہاکہ ادارے کے ملازمین کی تنخواہوں اورپنشن کے سلسلہ میں تین سوملین روپے کی گرانٹ کی سمری چیف سیکریٹری سندھ کوارسال کی جاچکی ہے لیکن افسوس کہ سندھ حکومت کی جانب سے سندھ اسمال انڈسٹری کارپوریشن کی سالانہ گرانٹ تاحال منظورنہیں کی جارہی جس کے باعث ادارے کے ہزاروں ملازمین اوران سے وابستہ ہزاروں خاندانوں کا معاشی مستقبل غیریقینی ہوگیا ہے اورادارے کے ملازمین اوران کے اہل خانہ شدید مالی مشکلات کا شکار ہیں۔ ندیم نصرت نے کہاکہ رمضان المبارک کی آمدہے اور ا س مقدس مہینے میں ہزاروں خاندانوں کے گھروں کے چولہے ٹھنڈے کرنا اورانہیں دووقت کی روٹی سے محروم کرنا سراسر ظلم ہے جس کی جتنی بھی مذمت کی جائے کم ہے ۔ انہوں نے کہاکہ ایم کیوایم ، سندھ اسمال انڈسٹری کارپوریشن کے مظلوم ملازمین کے ساتھ ہے اور ان کے جائز حقوق کیلئے ہرسطح پر صدائے احتجاج بلند کرتی رہے گی۔ندیم نصرت نے وزیراعلیٰ سندھ قائم علی شاہ سے مطالبہ کیاکہ سندھ اسمال انڈسٹری کارپوریشن کی سالانہ گرانٹ فی الفور منظور کی جائے اور ادارے کے ملازمین کو جلدازجلد تنخواہیں اور پنشن ادا کی جائیں۔