سائیں جی ایم سید پاکستان کے غدارنہیں تھے،اگر جی ایم سیدنہ ہوتے توآج پاکستان نہ بنتا۔الطاف حسین
لندن ۔۔۔ 4 جون 2016ء
متحدہ قومی موومنٹ کے قائدجناب الطاف حسین نے کہاکہ سندھ کے معروف بزرگ رہنماسائیں جی ایم سید پاکستان کے غدارنہیں تھے، اگرسائیں جی ایم سیدنہ ہوتے توآج پاکستان نہ بنتا۔ انہوں نے یہ بات ایم کیوایم کے کارکنوں کی گرفتاریوں اورلاپتہ کئے جانے کے خلاف آج نوابشاہ پریس کلب کے سامنے دیے جانے والے دھرنے سے خطاب کرتے ہوئے کہی۔ جناب الطاف حسین نے کہاکہ آج جی ایم سیدمرحوم اس دنیامیں نہیں ہیں لیکن سندھی نوجوان آج جی ایم سیدمرحوم کے قریبی لوگوں سے جاکرپوچھ سکتے ہیں کہ مرحوم نے اپنی قریبی لوگوں سے کئی بار کہاتھاکہ سندھ کواگرکوئی حقوق دلاسکتاہے تووہ الطاف حسین ہی دلائے گا۔انہوں نے کہا کہ میں نے جی ایم سید مرحوم سے اسپتال میں اورکراچی میں حیدرمنزل پر جاکران سے ملاقاتیں کیں، وہ مجھ سے ملاقات کرکے بہت خوش ہوتے ۔انہوں نے کہاکہ جی ایم سید مرحوم کوغدارکہنے والو! اگرجی ایم سید نہ ہوتے توپاکستان نہ بنتا۔