لانڈھی کے علاقے 36بی میں فائرنگ سے نوجوان کے جاں بحق ہونے کے واقعہ پر ایم کیوایم رابطہ کمیٹی کا اظہار مذمت

کراچی۔۔۔ 2 جون 2016ء

متحدہ قومی موومنٹ کی رابطہ کمیٹی نے لانڈھی کے علاقے 36 بی میں مسلح افرادکی جانب سے فائرنگ کے واقعہ کی شدیدمذمت کی ہے اورفائرنگ میں ایک نوجوان کے جاں بحق اوردیگرافرادکے زخمی ہونے پر دلی افسو س کااظہارکیاہے ۔ اپنے ایک بیان میں رابطہ کمیٹی نے کہا کہ بعض مذہبی انتہاپسند عناصراپنے مذموم مقاصد کے حصول کیلئے فروعی اختلافات کوہوادینے کی کوششیں کررہے ہیں اوراپنی شرپسندانہ کارروائیوں کے ذریعے عوام کے درمیان فسادکی آگ بھڑکانے کی کوشش کررہے ہیں جس کی جتنی بھی مذمت کی جائے کم ہے ۔ رابطہ کمیٹی نے کہاکہ اگر علاقہ کی پولیس، رینجرزاورانتظامیہ صورتحال کو خراب ہونے سے روکنے کیلئے غفلت کامظاہر ہ نہ کرتی تو آج کایہ افسوسناک واقعہ رونمانہ ہوتا۔علاقے کے لوگ یہ شکایت کررہے ہیں کہ پولیس وانتظامیہ شرپسند عناصر کی حمایت کررہی ہے جس کی وجہ سے صورتحال بہترہونے کے بجائے خراب ہورہی ہے ۔رابطہ کمیٹی نے مہاجر عوام سے اپیل کی کہ وہ اپنی صفوں میں اتحاد برقرار رکھیں اور آپس میں امن،مفاہمت اوربھائی چارے کی فضاء کوخراب کرنے کی ہرکوشش کوناکام بنادیں۔رابطہ کمیٹی شرپسندعناصرکی فائرنگ سے جاں بحق ہونے والے نوجوان محمدعباس کے لواحقین سے دلی تعزیت کااظہارکیااوردعاکی کہ اللہ تعالیٰ محمدعباس کی مغفرت فرمائے اورتمام لواحقین کوصبرجمیل عطا کرے ۔ رابطہ کمیٹی نے زخمیوں کی صحتیابی کے لئے بھی دعاکی ۔