ایم کیوایم بلوچستان کمیٹی کے انچارج الطاف مینگل اور حق پرست رکن صوبائی اسمبلی یوسف شہوانی نے بلوچستان کے سابق سیکریٹری

کراچی ۔۔۔ 08؍ مئی 2016ء

متحدہ قومی موومنٹ کی بلوچستان کمیٹی کے انچارج الطاف مینگل اور حق پرست رکن صوبائی اسمبلی یوسف شہوانی نے بلوچستان کے سابق سیکریٹری خزانہ مشتاق رئیسانی کے گھر سے قومی خزانے سے لوٹے گئے 65 کروڑ روپے نکلنے پر گہری تشویش کا اظہار کرتے ہوئے اس واقع کو قومی المیہ قرار دیا ہے۔ اپنے ایک بیان میں انہوں نے کہا کہ بلوچستان کے عوام انتہائی قابل اور ہنرمند ہیں لیکن انہیں بلوچستان کے حکمران جان بوجھ کر پسماندگی میں دھکیل رہے ہیں اور بلوچستان کے عوام کیلئے ملنے ولی رقوم اپنی عیاشیوں میں اڑا رہے ہیں۔ انہوں نے کہا کہ بلوچستان سمیت ملک بھرمیں کرپشن کی روک تھام کیلئے حکومتی سطح پر کچھ نہیں کیا جارہا جوکہ حکومت کیلئے لمحہ فکریہ ہے۔ اپنے بیان میں انہوں نے مطالبہ کیا کہ سابقہ و موجودہ حکمرانوں کا کڑا احتساب کیا جائے اور لوٹی ہوئی دولت بلوچستان کے عوام کی فلاح و بہبود، تعمیر و ترقی، تعلیم و صحت سمیت تمام بنیادی سہولیات کی فراہمی پر صرف کی جائیں۔