حکومت کی جانب سے قومی بچت اسکیموں پر شرح منافع میں کمی کئے جانے پر حق پرست ارکان قومی اسمبلی کااظہا رمذمت

کراچی ۔۔۔2، اپریل2016ء 

متحدہ قومی موومنٹ کے ارکان قومی اسمبلی نے حکومت کی جانب سے قومی بچت اسکیموں پر شرح منافع میں کمی کی سخت ترین الفاظ میں مذمت کی ہے اور کہا ہے کہ قومی بچت اسکیموں پر شرح منافع کم کرکے حکومت نے ملک بھر کے عوام کو ماہانہ اور جائز منافع سے محروم کردیا ہے ۔ اپنے مشترکہ بیان میں انہوں نے کہاکہ مہنگائی کے دور میں عوام قومی بچت اسکیموں کے سرٹیفیکٹ خرید کر تھوڑا بہت ماہانہ منافع حاصل کرلیا کرتے تھے لیکن حکومت نے اس منافع کی شرح میں مزید کمی کرکے عوام کا مزید مایوسی میں مبتلا کردیا ہے ۔ انہوں نے کہاکہ قومی بچت اسکیموں کے سرٹیفکیٹ ریٹائرڈ اور پنشنرز افراد خصوصی طور پر خریدتے ہیں تاکہ اس کے منافع سے اپنے روز مرہ کے معمولات زندگی چلا سکیں اور اس تناظر میں حکومت کی جانب سے قومی بچت اسکیموں کی شرح میں اضافہ کیاجانا چاہئے تھامگر اس کے برعکس حکومت نے اس میں کمی کرکے عوام کو مسائل اور مشکلات سے دوچار کردیا ہے جس کی جتنی بھی مذمت کی جائے کم ہے ۔ حق پرست ارکان قومی اسمبلی نے وزیراعظم نواز شریف سے مطالبہ کیا کہ قومی بچ اسکیموں پر شرح منافع کمی کا سختی سے نوٹس لیاجائے اور قومی بچت اسکیموں میں عوامی مفاد کو مد نظر رکھنے کی مثبت ، ٹھوس اور عملی پالیسی اپنائی جائے ۔