شہر کے مختلف علاقوں سے ایم کیوایم کے کارکنان سمیت نومنتخب چیئرمین کی بلاجواز اور غیر قانونی گرفتاریوں پر رابطہ کمیٹی کااظہار مذمت

کراچی ۔۔۔21، مارچ2016ء 

متحدہ قومی موومنٹ کی رابطہ کمیٹی نے قانون نافذ کرنے والے اداروں کے ہاتھوں شہر کے مختلف علاقوں سے ایم کیوایم کے کارکنان سمیت نومنتخب یوسی چیئرمین کی بلاجواز اور غیر قانونی گرفتاریوں کی سخت ترین الفاظ میں مذمت کی ہے اور کہا ہے کہ چھاپے و گرفتاریوں کے اوچھے ہتھکنڈوں کے ذریعے ایم کیوایم کارکنان کو ہراساں کرنے اور ان کی سیاسی سرگرمیوں پر غیر اعلانیہ پابندی عائد کرنے کا عمل فی الفور بند کرایاجائے۔ ایک بیان میں رابطہ کمیٹی نے کہاکہ قانون نافذ کرنیو الے اداروں کے اہلکاروں نے مورخہ21مارچ 2016ء کو اپنی چھاپہ مار کاروائیوں کے دوران بلدیہ ٹاؤن کی یوسی 29کے نومنتخب حق پرست چیئرمین نادر حسین اور یوسی 29کے کارکن سلیم کو صاف کراچی مہم کے دوران بلاجواز گرفتار کرلیا ۔ اسی طرح قانون نافذ کرنے والے اداروں کے اہلکاروں نے محمود آباد ٹاؤن یوسی 4کے کارکن صغیر احمد شیخ اور ایم کیوایم اورنگی ٹاؤن یوسی 24کے کارکن معروف کو غیر قانونی طور پر حراست میں لے کر نامعلوم مقام پر منتقل کردیا ۔ رابطہ کمیٹی نے مزید کہاکہ قانون نافذ کرنے والے اداروں کے اہلکاروں نے مورخہ20مارچ 2016ء کو رنچھوڑ لائن ٹاؤن یوسی 22کے کارکن آصف ، اورنگی ٹاؤن یوسی 19کے کارکن شفقت اور سرجانی ٹاؤن یوسی 38کے کارکن محمد ارشد میؤ کو بلاجواز گرفتار کرلیا ۔ رابطہ کمیٹی نے کہاکہ ایم کیوایم کو کچلنے اور مہاجروں کے اتحاد کو پارہ پارہ کرنے کی گھناؤنی سازش کی جارہی ہے ، ایک جانب ایم کیوایم کے منتخب نمائندوں کو وفاداریاں تبدیل کرانے کیلئے دھمکی آمیز فون کئے جارہے ہیں اور دوسری جانب شہر کے مختلف علاقوں سے ایم کیوایم کے بے گناہ کارکنان کی گرفتاریوں کا سلسلہ جاری ہے جس کی جتنی بھی مذمت کی جائے کم ہے ۔ رابطہ کمیٹی نے وزیراعظم نواز شریف، چیف آف آرمی اسٹاف راحیل شریف اور وزیراعلیٰ سندھ سید قائم علی شاہ سے مطالبہ کیا کہ ایم کیوایم کے کارکنان کی بلاجواز اور غیر قانونی گرفتاریوں کا سختی سے نوٹس لیاجائے اور غیرقانونی گرفتاریوں کا سلسلہ فی الفور بند کرایاجائے ۔