دہشت گردی کے ذریعے ملکی سا لمیت سے کھیلنے والے سفاک دہشت گردوں کا فی الفور خاتمہ کیاجائے ، رابطہ کمیٹی ایم کیوایم

کراچی ۔۔۔16، مارچ2016ء 

متحدہ قومی موومنٹ کی رابطہ کمیٹی نے پشاور صدر بازار سنہری مسجد کے قریب سول سیکریٹریٹ کی بس میں بم دھماکہ کی شدید مذمت کی ہے اور مطالبہ کیا ہے کہ دہشت گردی کے ذریعے ملکی سا لمیت سے کھیلنے والے سفاک دہشت گردوں کا فی الفور خاتمہ کیاجائے ۔ ایک بیان میں رابطہ کمیٹی نے کہاکہ سول سیکریٹریٹ کی بس کو نشانہ بنا کر دہشت گردوں نے بڑا وار کیا ہے اور دہشت گردی کی اس کاروائی کے ذریعے یہ ثابت کرنے کی کوشش کی ہے کہ سفاک دہشت گرد اب بھی ملک میں سرگرم عمل ہیں اور عوام کی جان و مال سے کھیل کر ملک و قوم کو عدم استحکام سے دوچار کرنے کی پالیسی پر گامزن ہیں ۔ رابطہ کمیٹی نے بم دھماکہ میں شہید ہونے والے سرکاری ملازمین کے تمام سوگوار لواحقین سے دلی تعزیت و ہمدردی کااظہار کرتے ہوئے انہیں صبر کی تلقین کی اور دعا کی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور زخمیوں کو جلد و مکمل صحت یابی عطاکرے ۔ رابطہ کمیٹی نے وزیراعظم نوازشریف ، چیف آف آرمی اسٹاف جنرل راحیل شریف اور وزیر اعلیٰ خیبرپختونخوا پرویز خٹک سے مطالبہ کیا کہ پشاور بم دھماکہ کا سختی سے نوٹس لیاجائے اور اس میں ملوث سفاک دہشت گردوں کو فی الفور گرفتار کرکے قرار واقعی سزا دی جائے ۔